Os británicos Is Tropical actuarán na Sala Karma o próximo 31 de xaneiro
Por Alejandro Espiño
A Sala Karma iniciará 2015 cun concerto moi especial. Is Tropical, unha das propostas musicais máis interesantes xurdidas no Reino Unido nos últimos anos, incluíu a Pontevedra na xira que protagonizarán o próximo mes de xaneiro por España.
En concreto, o seu concerto na cidade do Lérez será o sábado 31 de xaneiro. Será a única data en Galicia, xa que actuarán só en Granada, Madrid, Barcelona e Pontevedra.
Tras actuar en varios festivais estivais por todo o país, Is Tropical lanza o 8 de decembro dous novos temas, Crawl e On My Way, en formato de dez polgadas. Son os primeiros singles que os británicos irán publicando dende ese día e ata agosto de 2015 e cuxa suma configurará o que vai ser o seu terceiro disco, Black Anything.
Is Tropical é unha banda inglesa de electro-pop bailable pero cun punto inquietante, ao Klaxons. Dende que se formaron en 2009, a súa traxectoria non deixou de crecer. Unha canción publicada no devandito ano levounos a fichar polo selo francés Kitsuné, o mesmo de Two Door Cinema Club, cos que gardan certas similitudes estéticas. O seu primeiro dico, Native To, editouse en 2011 e recibiu varios premios internacionais.
Tras pasarse a maior parte de 2011 e 2012 xirando, entre outros, por Europa, Estados Unidos ou Xapón, en xaneiro de 2013 publicaron o EP Flags, de máis marcado acento electrónico, e en maio do mesmo ano chegou o seu segundo longa duración, I'm Leaving, no que engadiron máis profundidade, variedade e grava ao seu son.
Precisamente, dende que en maio telonearon a Crystal Fighters a súa popularidade non fixo máis que subir como a escuma entre o seu público español e esperan repetir o éxito con esta xira polo noso país que lles traerá a Pontevedra.
Relacionadas:
-
Is Tropical fai vibrar á Sala Karma de Pontevedra cun concerto cheo de enerxía, ritmo e boa onda
Por Alejandro Espiño |
-
Vinila von Bismark presentará o 20 de febreiro na Sala Karma o seu primeiro disco en solitario
Por Alejandro Espiño |
-
Arizona Baby presentará en marzo en Pontevedra "Secret Fires", o seu terceiro disco
Por Alejandro Espiño |
-
Pablo Carbonell amosa as súas 'Canciones de cerca' nun concerto na Sala Karma
Por Diego Torrado |