Aprendendo arte da man de Kike Ortega
![Redacción](/web/cache/scene/uploads/xornalistas/foto/_S7QytKoutjK3UsovKMnMzytWsi62MjSxUqrKz891Lsov0DEyAC_/_Il61oA_/506490f5a15ce-c6ku5opwb5qbtijalxd0_reasonably_small.jpeg)
Por Redacción
Os nenos de 4 a 12 anos que acoden habitualmente ao espazo cultural Taller Abierto da praza da Estrela recibiron este venres a visita do pintor e arquitecto pontevedrés Kike Ortega, que lles explicou a súa obra e o seu modo de expresión artística.
Entre as 17.00 e as 19.00 horas, o artista traballou directamente con dez nenos aspirantes a artistas nunha obra que posteriormente se poderá ver na exposición que se inaugurará o 25 de xuño neste espazo artístico do casco histórico.
Kike Ortega, que compaxina o traballo de arquitecto co mundo da pintura, basea a súa obra pictórica en traballar sobre o corpo humano, a persoa e o seu estado emocional. Dende o ano 2001 realizou exposicións por todo o territorio español e impartiu cursos de arte a grupos reducidos, experiencia que puxo en práctica este venres.
En Taller Abierto xa se puido gozar meses atrás dunha sesión especial de acuarela da man do pintor Antón Sobral e os seus responsables indican que esperan seguir recibindo outras visitas de artistas nos próximos meses co fin de fomentar este contacto directo de artistas cos máis pequenos.
Clases de arte con Kike Ortega en Taller Abierto
© Daniel Santomé