A Sociedad Deportiva Teucro queda a un paso de pechar o seu plantel tras anunciar este venres a contratación de Nikola Perovic.

A entidade pontevedresa recorre novamente ao mercado internacional na busca dunha peza chamada a ser importante no esquema ofensivo do equipo.

Con Perovic o Teucro completa a súa primeira liña. Trátase dun xogador serbio nado no ano 92, de 1,95 metros e 95 quilos de peso que actúa na posición de lateral esquerdo ofensivo. Ademais, sinalan no club, pode actuar como defensor central.

"Buscabamos un xogador das súas características, bo defensor no centro e que nos dese lanzamento, creo que Nikola vai dar o que necesitabamos para completar a primeira liña", recoñeceu sobre o novo xogador teucrista Luís Montes.

Nikola Perovic procede do MRK Sloga bosníaco despois de pasar por outros clubs como o RK Partizan (Serbia), Bursa Nilüfer BK (Turquía) ou o Bsv Stans (Suíza). Asina por unha tempada con opción a outra máis.

Con el son 14 os xogadores confirmados para o proxecto teucrista na División de Honra Prata, xunto a Fran Bujalance, Federico Wermbter, Eduardo Salazar, Diego Prada, Vicente Poveda, Cristopher Corneil, Samu Pereiro, Ferrán Cisneros, Andrés Moyano, Lucas Abadía, Jose Andrés Torres, Nemanja Bojicic e Marko Dzokic.