Así foi o 'coro dos escravos' que percorreu Pontevedra "en defensa da liberdade"

Máis de trescentas persoas vestidas de branco percorreron as rúas de Pontevedra. Foi o 'coro dos escravos' que o artista portugués Vasco Araújo quixo xuntar nunha marcha "en defensa da liberdade". Foi a súa proposta para a Bienal de Arte de Pontevedra.

Esta acción colectiva supuxo a estrea do programa de Artes Vivas da bienal, comisariado por Iñaki Martínez, que se desenvolverá de xeito semanal en diferentes localidades da provincia, entre elas Pontevedra, Vigo, Sanxenxo, Ponteareas e O Grove.

Este canto colectivo á liberdade e á dignidade humana foi o eixo da acción "Libertas: Da condición de persoa libre", coa que Araújo converteu o espazo urbano nun escenario de arte e reivindicación social, a través deste coro saído da ópera Nabucco, de Giuseppe Verdi.

A performance partiu ás 20:00 horas do Pazo da Cultura e percorreu diversas rúas da cidade. Centos de voces uníronse para interpretar unha peza cargada de simbolismo, tradicionalmente asociada á loita contra a opresión, nun acto que emocionou a todo o público asistente.

Esta peza musical segue a ser un dos himnos contra a opresión, desde que Lombardía, a provincia italiana do imperio austrohúngaro, aspiraba á liberdade no ano 1842.

Con Libertas, Vasco Araújo busca cuestionar a idea de liberdade do ser humano, que posúe liberdade para falar, e as fronteiras que existen entre sociedades, clases, grupos e individuos,

Estes enfrontamentos, segundo o autor, rematan case sempre en espazos e accións opresivas exercidas por un grupo dominante sobre outro, que nos lembran as antigas relacións entre homes e mulleres, conservadores e liberais, colonizadores e colonizados, amos e escravos.

Martínez Antelo destacou o impacto "visual e emocional" desta proposta, unha acción que activou o espazo público "desde o corpo, a voz e o encontro entre iguais".

Para o comisario de Artes Vivas, o éxito desta acción "amosa o poder transformador da arte contemporánea cando se pon ao servizo da sociedade e se fai en diálogo coa cidadanía".

Atento ao paso de Libertas, o presidente da Bienal de Arte, Rafa Domínguez, subliñou que este evento "non é só unha exposición de arte" senón que tamén "é unha aposta pola cidade, pola súa xente e pola cultura que se vive na rúa".

Celebrou tamén a resposta "entusiasta" da cidadanía a esta iniciativa, "que nos convida a pensar xuntos sobre o mundo no que vivimos".