A poeta viguesa María Álvarez Martínez, coñecida artísticamente como Masha, é a gañadora do XXIII Premio de Poesía Concello de Marín.
Así o decidiu o xurado avaliador, composto por Tamara Andrés, Silvia Penas e Ismael Ramos.
O premio está dotado con 1.000 euros.
O xurado destacou que a obra gañadora, titulada Outros contiños de Canterbury, supón unha recreación "moi fresca", que ten un estilo narrativo que non cae no prosaico e que as imaxes e accións poéticas "están moi ben construídas".
"Presenta unha contemporaneidade que serve como testemuña documental e presenta unha estrutura novidosa e divertida, cunha voz diferente", sostivo o xurado.
María Álvarez Martínez é licenciada en filoloxía inglesa. Actualmente, exerce como profesora no ensino secundario e compaxina o seu labor profesional cunha carreira musical dentro do grupo Os Residuos Atractivas.
Residiu dous anos nos Estados Unidos, o que inspirou o poemario gañador do XV Premio de Poesía Victoriano Taibo: Dakota, e no 2025 foi galardonada coa Residencia Literaria Aodh Ruadh Ó Domhnail (Irlanda).
Pola súa parte, o accésit de 200 euros que tamén se concedeu no marco deste certame foi para Antón de Dios Riveiro (Cee, 1985), pola súa obra Do meu nome.
Licenciado en tradución e Interpretación pola Universidade de Vigo, este autor conta con dous mestrados, un en traducción multimedia e audiovisual e outro en formación do profesorado.
Actualmente, exerce como docente de inglés no IES Terra de Soneira de Vimianzo.
Ten publicadas as obras As Mans Atlánticas da Ausencia, Alén do Corpo e Apatria. Ademais, gañou o segundo premio no XVIII concurso de poesía das Terras do Chamoso.
Engade Pontevedra Viva como fonte preferida de Google de balde
Mantente informado coas últimas noticias de actualidade.