"Recuperar a Bienal permitiranos proxectar a Pontevedra como un referente no circuíto cultural". Así o defendeu este mércores o vicepresidente da Deputación Provincial, Rafa Domínguez, durante a Feira Internacional de Turismo de Madrid, Fitur.
Domínguez e o presidente da Deputación, Luis López, presentaron en Fitur o regreso da Bienal, a máis antiga de España, que retomará a actividade este verán despois de 15 anos de ausencia.
Na presentación no stand que Turismo de Galicia ten na feira tamén estiveron o presidente da Xunta, Alfonso Rueda, e o conselleiro de Cultura, Jose López Campos.
Luis López insistiu en que a Bienal "facía de Pontevedra a capital internacional da arte cada dous anos" e "era algo que pagaba a pena recuperar para consolidarnos como un destino turístico internacional ligado á cultura".
O acto, presentado pola xornalista Rebeca Marín, tamén serviu para proxectar unha peza audiovisual para promocionar a Bienal na que foron protagonistas os piragüistas do Centro Galego de Tecnificación Deportiva, o alumnado da Escola de Cantería e o persoal do Museo de Pontevedra.
Unha das grandes novidades do regreso da Bienal será a inclusión dun programa de artes vivas que implicará a outros catro concellos da provincia: Ponteareas, Vigo, Sanxenxo e O Grove. López defendeu que "o noso proxecto é provincial: descentralizar a programación cultural, deportiva e mesmo turística das grandes cidades".
Rafa Domínguez, "o verdadeiro artífice da recuperación da Bienal" en palabras de Luis López, insistiu en que este tipo de eventos atraen a expertos, coleccionistas, críticos e artistas internacionais, que "contribuirán a difundir a nosa identidade cultural".
A programación estará deseñada para dialogar sobre tendencias globais da arte contemporánea, "facendo que Pontevedra sexa vista como un punto de encontro creativo de relevancia nacional e internacional", subliñou Rafa Domínguez.
Luis López sinalou a recuperación da Bienal como un revulsivo para seguir posicionando a provincia como un destino turístico internacional.
VÍA MARIANA
O presidente da Deputación tamén divulgou ante representantes do sector turístico de distintos territorios de España e outros países outros atractivos do destino turístico Rías Baixas como a Vía Mariana, unha vía de peregrinación que atravesa trece concellos da provincia nun itinerario de máis de 400 quilómetros que une santuarios marianos entre Braga e Muxía.
Xunto coa deputada de Turismo, Nava Castro; e o responsable de Cultura, Jorge Cubela; o presidente Luis López presentou a Vía Mariana como "un itinerario que consolida un modelo de turismo ligado á natureza, respectuoso co medio ambiente, afastado de masificacións e para completar en calquera época do ano".
"A Vía Mariana é a ferramenta perfecta para entender as Rías Baixas, para mergullarse na súa tradición, descubrir tesouros naturais e namorarse do seu carácter hospitalario", defendeu.
Jorge Cubela referiuse á Vía Mariana como un "proxecto turístico, pero tamén cultural, relixioso, económico e social para impulsar o noso territorio, para compartir con todo o mundo a súa beleza natural e cultural, para dinamizar a nosa economía y, con iso, mellorar a calidade de vida dos nosos veciños e veciñas".
DESTINO DE CINE
Acompañado polo presidente da Spain Film Commission, Manuel Guimeráns, o presidente Luis López e outros membros do seu goberno achegáronse ata o stand de Fitur Screen, onde Rías Baixas Film Comission conta cun mostrador permanente para amosar as "posibilidades infinitas" que ofrece a provincia para acoller producións audiovisuais de éxito.
Tamén participou na presentación do produto turístico da Mancomunidade do Salnés 'O Salnés Slowbusiness'.