As pistas de atletismo do Centro Galego de Tecnificación Deportiva de Pontevedra acollerán un dos grupos de competición na primeira xornada da liga nacional de Primeira División.
Así o confirmou a Real Federación Española de Atletismo tras establecer os emparellamentos e sedes tanto de Primeira División como de División de Honra.
O atletismo de elite volverá así anos despois a Pontevedra nunha xornada de liga na que será anfitrión o equipo feminino da Sociedad Gimnástica.
No CGTD competirán dentro do Grupo C, o domingo 29 de abril, os equipos de Pielagos (2º no estadillo de marcas), Atletismo Feminino Celta (6º) e CEA Tenerife 1984 (13º), ademais da Gimnástica (12º) que afrontará a súa segunda tempada consecutiva na categoría.
O EQUIPO MASCULINO DEBUTARÁ EN MADRID
Un encontro complicado a priori debe afrontar tamén o equipo masculino da Gimnástica na máxima categoría, a División de Honra.
Un ano máis os mozos estrearanse en Madrid, en sede aínda por confirmar, ante os locais do AD Marathon (5º), o FA Fent Camí Mistala (3º) e o Unicaja Atletismo (13º). O club pontevedrés está situado neste caso o posto 11 do estadillo de marcas.
No seu caso a xornada terá lugar o sábado 28 de abril.