A localidade alacantina de La Nucia é talismán para Arlet Ortiz. Se o pasado mes de marzo, con só 15 anos, proclamouse campioa de España Sub-21 de taekwondo, a deportista do Mat's de Marín repetiu éxito agora no Nacional Junior.
Arlet colgou a medalla de ouro na categoría de -52 quilos tras unha comeptición inmaculada. Desfíxose en primeira rolda da andaluza Ana Millán (21-0), en cuartos de final á madrileña Iciar Augado (7-0) e nas semifinais á murciana Andrea Rabal (7-2). Xa na pelexa polo título a marinese superou á madrileña Paula Cerro (11-5).
A vitoria leva ademais premio dobre xa que lle outorga a clasificación para o próximo Campionato de Europa da categoría.
O taekwondo pontevedrés tróuxose ademais outras dúas medallas de Alacante, as de Unai Silva (Mace Sport) e Cristina Otero (Mat's), ambos cun bronce nos seus respectivos pesos.
Silva subiu ao podio nos -68 quilos ao perder na semifinal nun apertado combate ante o leonés Pablo Rodríguez (5-6), mentres Cristina Otero foi terceira en -42 quilos ao ceder no penúltimo combate ante a balear Carolina Cortiñas.