Seguen as negociacións do Pontevedra cos compoñentes do seu persoal. Na tarde deste venres o club ofreceu a renovación a David Añón, Edu Sousa, Álex Fernández, Bonilla e Álex González, que estudarán a proposta e espérase respondan á mesma no prazo dunha semana. No caso de Santi Canedo tamén se lle ofreceu continuar, pero o porteiro desestimou a proposta e non seguirá no Pontevedra.
Á baixa de Santi Canedo, que apenas contou con oportunidades ante o bo rendemento de Edu Sousa, súmanse as de dous homes cunha dilatada traxectoria no club granate como o capitán Adrián Gómez e o centrocampista Jacobo Millán, aos que o club comunicou que non conta con eles, polo que se unen a unha lista na que xa figuran nada menos que nove xogadores, os tres citados máis Capi, Mateu, Miki, Portela e os cedidos Eneko e Mario Marco.
Desde o Pontevedra quíxose agradecer especialmente os servizos prestados ata a data por Adrián Gómez e Jacobo Millán "polo seu comportamento e profesionalidade na súa longa carreira deportiva no club granate", desexándolle "os maiores éxitos na súa vida persoal e na súa carreira profesional".