Novo paso na meteórica carreira de Jéssica Bouzas no circuíto profesional.
Por primeira vez a tenista arousá xogará a fase final dun torneo WTA 1.000, a máxima categoría posible salvando os Grand Slam.
Farao no WTA 1.000 de Madrid dentro dun cadro principal ao que accedeu este mércores tras vencer na segunda rolda da fase previa á estadounidense Sachia Vickery, número 129 do mundo.
Bouzas superou á súa rival en dúas mangas e case dúas horas de partido, sendo decisivo un primeiro set que se decidiu no desempate (7-6). A segunda manga, xa en vantaxe, pechouse cun claro 6-2.
Con este triunfo e á espera de ver ata onde chega Jéssica sobre a terra batida madrileña, situouse xa como terceira mellor tenista nacional, o que deixa ao seu alcance pelexar pola clasificación olímpica.