Numerosos veciños das distintas parroquias do rural pontevedrés manifestáronse este sábado en Pontevedra en contra dos coñecidos como "lombos", os resaltos instalados pola Deputación para acougar o tráfico reducindo a velocidade nas vías provinciais.
A manifestación partiu ao mediodía da praza da Ferrería e que percorreu a rúa Michelena ata concluír fronte á Casa Consistorial.
A mobilización avanzou tras a pancarta co lema "Rural de Pontevedra abandonado. Non ós lombos", e lanzando consignas como "Lores, escoita, ou rural está en loita", ou "Menos premios, máis veciños". Concelleiros do PP e de Cidadáns participaron na protesta.
Nun manifesto lido por José Manuel Pichel, veciño de Santa María de Xeve, esixiuse á Deputación e ao Concello de Pontevedra "a retirada total ou parcial dos resaltos instalados nas estradas das nosas parroquias de forma masificada e sen ningún tipo de consenso cos veciños".
Tamén se esixiu "a reforma integral daquelas estradas que precisan de ensanchado, beiravías e beirarrúas onde sexa posible, sinalización e sen descartar a instalación de medidas alternativas de acougado do tráfico menos intrusivas e máis económicas, pero só onde sexa estritamente necesario, en zonas especialmente sensibles, e sempre de forma consensuada cos veciños".