Un grupo de veciños concentrouse este sábado diante do consultorio de Ponte Sampaio para esixir ao Sergas a reapertura do servizo médico xa que actualmente só teñen atención de enfermería.
Estes veciños foron convocados pola Plataforma Veciñal Ponte Sampaio-A Canicouva que ten intención de seguir mobilizándose ata que recuperen este servizo que a día de hoxe obrígalles a acudir ao ambulatorio Virxe Peregrina, no centro da cidade.
O Sergas explica que as dimensións do local do consultorio non permiten garantir o cumprimento das medidas de seguridade sanitaria derivadas da pandemia da covid.
O alcalde de Pontevedra, Miguel Anxo Fernández Lores, propuxo usar provisionalmente a Casa da Cultura para permitir o restablecemento do servizo.