Os investigadores non teñen dúbida. A aparición dos dous cadáveres calcinados nun coche que estaba aparcado nunha paraxe illada de Campo Lameiro enmárcase nun crime machista.
Así o confirmaron este martes fontes próximas á investigación que, aínda que aclaran que outras hipóteses seguen abertas, esta sería a principal liña de traballo da Garda Civil.
E dentro destas pescudas, cada vez cobra máis forza -a falta de confirmación oficial- a posibilidade de que se trata dunha parella de Moraña da que non se sabe nada desde hai días.
El, segundo as fontes consultadas, tería antecedentes por violencia de xénero, tanto por agresións cometidas sobre a súa parella anterior como coa actual, á que moitos identifican xa como a vítima deste crime machista que sacudiu a toda a comarca.
O home tería ademais vixente unha orde de afastamento da muller, que figuraría tamén no sistema Viogén con risco alto. A pesar diso, ambos mantiñan a convivencia.
Os labores para a identificación dos dous cadáveres tardarán aínda "varios días" e as probas de ADN enviáronse a Madrid para ser analizadas.
A demora nos exames débese ao "grao de deterioración" no que apareceron ambos os cadáveres, o do presunto homicida e o da súa parella.
O corpo da muller estaba dentro do coche e moi afectado polas lapas -apenas quedan os seus ósos-, o que está a complicar a súa identificación.
Pola súa banda, o cadáver do home, que se atopaba á beira do vehículo, tamén estaba queimado, pero a súa parte superior atópase menos afectada polas lapas.