Os momentos máis complicados como consecuencia da infección do coronavirus parecen quedar atrás na Residencia Soremay de Pontevedra. Este centro de atención a persoas maiores chegou a superar os 60 casos activos a principios do mes de decembro, entre usuarios e persoal.
Durante o últimos dez días foron descendendo os casos nesta residencia. Este domingo 20 o Servizo Galego de Saúde (SERGAS) notifica que no centro conta con 27 persoas contaxiadas. 18 destes positivos son usuarios e os outros 9 son empregados que se atopan recuperándose da súa enfermidade nos seus domicilios.
Durante este período rexistráronse 5 falecementos por coronavirus en Hospitais de Pontevedra procedentes desta residencia. Nas últimas horas 11 usuarios ofreceron resultado negativo nas probas, que se suman aos cinco usuarios e seis traballadores do centro que tamén se recuperaban na xornada entre o venres e o sábado.
Segue sendo preocupante a situación na Residencia Pontevedra, do municipio de Vilaboa. Alí, segundo os datos da Consellería de Sanidade, permanecen 20 residentes enfermos por covid e contabilízanse 10 traballadores coa infección.
Por último, na Residencia DomusVi Ribadumia oito integrantes do persoal laboral constan como casos activos pero xa, desde hai días, non hai usuarios coa enfermidade.