Coma se fose unha homenaxe á tradición, a choiva deu unha tregua este domingo 8 de febreiro para poder gozar da presentación do tradicional Entroido de Cobres.
As madamas e galáns de tan particular celebración, todo un emblema que en Cobres se caracterizan pola ausencia total de máscaras, a vistosidade dos seus chapeus e polo colorido das súas vestimentas, converteron nun espectáculo o seu paseo polo municipio.
Sen auga durante toda a mañá a comitiva iniciou o seu percorrido ás 11.00 horas desde a Capela de Santa Marta de Bértola para pasar ás 12.00 horas por Figueirdo e ás 13.00 horas polo Campo da Festa de Postemirón.
Xa pola tarde estaban tamén previstas visitas a Paredes e As Salinas.
No percorrido desvelouse a gran novidade da presente edición do Entroido de Cobres, un novo baile bautizado co nome de 'Riomaior'.
Unha peza que nace para honrar o lugar que cada ano acolle a carpa do Entroido e que simboliza, explica o Concello de Vilaboa, con elegancia e movemento a forza colectiva desta celebración centenaria.
A xornada serviu para lembrar que o entroido está xa ás portas e que mantén viva unha tradición que evoca a identidade e memoria e que é parte dunha das xoias do patrimonio inmaterial galego.
Tradición que se mantivo ao longo dos anos "grazas ao compromiso das familias, da agrupación cultural Cobres e de todas as persoas que, ano tras ano, mantéñena acesa", defende o Concello.
Engade Pontevedra Viva como fonte preferida de Google de balde
Mantente informado coas últimas noticias de actualidade.