Traballadores do centro penitenciario da Lama, convocados polos sindicatos CSIF, ACAIP-UGT e CIG, concentráronse este martes, 3 de xuño, diante da Subdelegación do Goberno en Pontevedra.
Fixérono para reclamar medidas urxentes que garantan a seguridade do persoal nesta prisión, tras a grave agresión sufrida por un funcionario o mércores 28 de maio.
Segundo explicou Juan da Cruz, delegado sindical de CSIF, o incidente produciuse no módulo 1 do centro penitenciario cando un interno atacou cun pincho carcerario a un funcionario. "Foi un intento de homicidio en toda regra", afirmou o representante sindical.
"Este interno tomou a xustiza pola súa man e intentou agredir fortemente, lanzando unhas puñaladas a un compañeiro e ameazando a unha compañeira dicíndolle que se non se apartaba do medio tamén a ía puñalar", indican os sindicatos.
O funcionario conseguiu esquivar as coiteladas, pero sufriu un golpe que lle provocou lesións internas nun oído.
O delegado sindical destacou que os traballadores penitenciarios están completamente desprotexidos ante estas situacións: "Non dispoñemos nada máis que do noso corpo físico. Saltamos a un patio con 100 ou 200 internos e estamos nós sós, simplemente cunha camisa, un pantalón e unhas zapatillas".
Pola súa parte, Alberto Fernández, delegado sindical de ACAIP, fixo fincapé na necesidade de actualizar os protocolos e as normas: "Vivimos nun marco normativo que está moi lonxe da realidade actual. Vamos xa reiteradamente solicitando á Secretaría Xeral de Prisións que actualice o marco normativo e que nos recoñeza como axentes da autoridade".
Fernández subliñou que o problema non afecta só ao centro da Lama: "Nos últimos dous anos houbo mil incidentes con agresións a funcionarios en toda España, vinte deles só na Lama".
O sindicalista advertiu que o centro pontevedrés, por ser de máxima seguridade, "ten internos bastante conflitivos", e insistiu en que "necesitamos novos medios".
Ambos os representantes sindicais coincidiron en sinalar que a lexislación penitenciaria está obsoleta: "Temos unha lei penitenciaria do ano 79 e un regulamento do 76, con parte do regulamento do 81 en vigor, e a sociedade nestes anos avanzou enormemente", explicou Fernández.
Entre as principais reivindicacións, os sindicatos esixen o recoñecemento dos funcionarios de prisións como profesión de risco e unha revisión dos criterios de clasificación dos internos.
"Desde a Secretaría Xeral desbotan o primeiro grao, que é a clasificación máis extrema para os internos que non se adaptan ao réxime normal, e o que fan é introducilos e mesturalos con internos de segundo grao", denunciou Da Cruz.
Ademais, os representantes sindicais alertan de que na actualidade o centro penitenciario da Lama conta con arredor de 40 vacantes só na área de vixilancia, o que, sumado á elevada media de idade do persoal, dificulta aínda máis a tarefa de control e seguridade fronte a internos, en moitos casos, "rapaces novos que fan ximnasio e temos que estar moi preparados".
A concentración deste martes busca visibilizar a crecente escalada de violencia que sofren os funcionarios de prisións, especialmente na Lama, que se converteu no cárcere galego con maior número de agresións rexistradas desde 2020, acumulando 37 ataques oficiais, 32 deles nos últimos tres anos.
Os representantes sindicais mantiveron despois da protesta un encontro co subdelegado do Goberno, Abel Losada, para transmitir as súas demandas para un centro penitenciario que conta cun número superior a mil internos.