Anabel Gulías, concelleira de Promoción Económica, iniciaba este mércores a rolda de contactos con diversos colectivos e asociacións da cidade para escoitar diferentes opinións sobre a instalación do mercado ambulante.
A última hora da tarde mantiña un encontro con representantes da Asociación de Ambulantes Autónomos para buscar solucións ao conflito aberto, unha vez que o goberno local decidiu trasladar o mercado ambulante a Rafael Areses a partir deste sábado 29 de xullo con motivo das actividades que se van a desenvolver durante o verán na Alameda, recinto onde se celebraba a feira desde finais de abril.
Os vendedores néganse a ese traslado e anuncian que suspenden a celebración da feira durante o vindeiro 29 de xullo. Piden permanecer na Alameda durante todo o ano, agás en ocasións especiais nas que demandan o traslado a outra zona do centro da cidade e non á rúa que bordea ao Pazo da Cultura, ao entender que esa localización prexudícalles economicamente, segundo indica Margarita González, presidenta do colectivo.
Os feirantes estudan a opción de iniciar protestas #ante esta situación e demandan o apoio dos diferentes colectivos e clientes. Desde o sábado 22 de xullo están a recoller firmas en contra do traslado.
Pola súa banda, a concelleira Anabel Gulías indica que o Concello "sempre estará aí para escoitar e buscar as solucións que máis beneficien á cidade". Está previsto que a concelleira se reúna durante este xoves con praceiras do Mercado de Abastos, con representantes de Hoempo e con distintos comerciantes e hostaleiros do centro histórico coa intención de obter outras impresións.