A Consellería de Sanidade ordenou o peche do Colexio Plurilingüe Calasancio de Pontevedra por un brote de nove casos positivos de COVID-19 entre os profesores e o persoal non docente.
Tras dar positivo nun test PCR un dos membros do equipo directivo o mesmo día da volta ao cole, houbo que confinar outras cinco persoas de dirección. O sábado, unha profesora que non formaba parte dese equipo tamén daba positivo na PCR. Esta docente dera clase aos alumnos o xoves e o venres.
Segundo informou o propio centro educativo nun comunicado, "ao longo da fin de semana, e como medida de seguridade, a todo o persoal do centro (docentes, persoal de limpeza, administración, secretaría e comedor) realizóuselles tamén unha PCR, con resultado positivo de oito persoas".
O centro entregou toda a información requirida polo Servizo Epidemiolóxico da Xunta para que se poida realizar o consecuente rastrexo por parte das autoridades sanitarias.
Segundo o protocolo establecido para estes casos agora deberá procederse á desinfección das instalacións, proceder ao rastrexo de contactos das persoas infectadas con especial atención ao posible risco de transmisión entre o alumnado e o resto da comunidade educativa.
A dirección do colexio Calasancio tamén comunica que están "en constante contacto" co inspector de Educación e o xefe territorial de Educación, César Pérez Ares, así como o Servizo de Epidemioloxía de Galicia, "e desde o colexio estamos a seguir todos os pasos que nos van indicando".
As clases foron suspendidas "ata novo aviso".
O CONCELLO, AO DISPOR DO COLEXIO
Desde o Concello, o edil de Educación trasladou o "cariño" e o "ánimo" a toda a comunidade educativa do Colexio Calasancio ante a "situación preocupante" que atravesa polo brote detectado entre o persoal do centro.
Aínda que non se trata dun colexio público, engadiu Tino Fernández, o Concello púxose "a disposición" da dirección do centro para colaborar con eles.
Tras este comezo "convulso" do curso escolar en Pontevedra, o concelleiro socialista lamentou que a Xunta de Galicia "siga derivando" as súas responsabilidades cara a outras administracións e reclamou que poña fin á "improvisación" na súa xestión.