Sanxenxo impulsa 'RenÓbrate', un programa de emprego e formación enfocado na construción

O Concello de Sanxenxo, a Xunta de Galicia e a Fundación Laboral da Construción asinaron este xoves un convenio de colaboración para desenvolver no municipio o programa RenÓbrate, unha iniciativa mixta de emprego e formación que ten como obxectivo reforzar o sector construción.

Este programa terá unha duración de nove meses e ofrecerá un total de 20 prazas para maiores de 18 anos inscritos no Servizo Público de Emprego de Galicia.

Durante ese tempo, os participantes recibirán formación práctica e teórica remunerada co salario mínimo interprofesional. O obxectivo é que polo menos o 60% dos alumnos consiga un emprego nos dous meses posteriores á finalización do curso.

Durante a firma do convenio, o alcalde de Sanxenxo, Telmo Martín, puxo en valor este tipo de iniciativas para dar resposta á escaseza de profesionais na construción e lembrou que "xa o fixemos coa hostalaría e agora facémolo co sector da construción grazas á Xunta e á Fundación Laboral".

Pola súa banda, a directora xeral de Emprego, Zeltia Lado, explicou que este programa busca "complementar os obradoiros de emprego duais e responder as necesidades da contorna cun programa experiencial remunerado para 20 persoas".

Sanxenxo non será o único lugar onde se desenvolverá RenÓbrate, pois Carballiño, Arteixo e Santiago tamén formarán parte desta iniciativa que está dotada con preto de 1,9 millóns de euros.

No municipio pontevedrés, o Concello facilitará os espazos onde se impartirá a formación e os alumnos realizarán prácticas mediante traballos de mantemento e mellora de edificios e infraestruturas municipais. Todo iso en coordinación coa Concellería de Mantemento e Servizos que dirixe Yago Torres.

Entre as actuacións previstas figuran traballos de pintura, alicatados, reparación de gretas, colocación de tabiques de pladur, bordos e baldosas, instalación de sinalización viaria e execución de pequenas laxas e cunetas transitables.

A selección de participantes comezará de forma inmediata co obxectivo de iniciar o programa a finais de agosto e concluílo o próximo mes de maio. Os interesados deberán porse en contacto coa Fundación Laboral da Construción a través do seu correo ccoloret@fundacionlaboral.org ou no teléfono 660 604 526.