As persoas voluntarias da asociación Vaipolorío volveron cambiar este sábado a comodidade da fin de semana por botas, luvas e moitas ganas de traballar polo río Gafos.
A xornada foi intensa e moi produtiva, centrada na limpeza das pontes do río no ámbito do Espazo Natural de Interese Local (ENIL), un traballo tan discreto como esencial para a saúde do ecosistema e a seguridade da zona.
Os labores realizáronse de maneira totalmente manual, sen maquinaria, retirando principalmente madeira morta e restos de ramaxe que quedaran atrapados en pontes e pequenas represas. Este tipo de acumulacións, aínda que poidan pasar desapercibidas, poden agravar os efectos das enchentes do río ao actuar como tapóns que aumentan a forza da auga. A súa retirada axuda, por tanto, a minimizar riscos cando chegan as choivas máis intensas.
Non se trata de eliminar a vexetación natural da canle, pois estas plantas que crecen no río cumpren unha función fundamental, xa que as súas raíces fixan o leito, reducen a erosión e restan velocidade á corrente, amortecendo o impacto da auga contra pontes, defensas e outras infraestruturas.
Ademais da limpeza, o voluntariado aproveitou a xornada para realizar tarefas de mantemento ambiental, como a retirada de exemplares de herba da Pampa (Cortaderia selloana), unha das especies invasoras máis estendidas en Galicia. Aínda que os seus vistosos penachos brancos fana parecer unha planta ornamental, a súa capacidade de expansión supón unha ameaza para a flora autóctona. A presenza desta especie xa fora detectada hai anos na contorna do río Gafos, mesmo dentro do ENIL, polo que a súa eliminación de raíz é fundamental para frear o seu avance.
A xornada completouse coa poda das maceiras de río, unha variedade autóctona do Gafos. Trátase dunha especie rústica, ben adaptada a terreos húmidos e profundos, que enraíza facilmente a partir de estacas e resulta especialmente valiosa como patrón para outras variedades de manzano.