Flotadores e lentes acuáticas ás portas do colexio Froebel para denunciar as pingueiras
Por Anxo Lourido
"Mércores negros". Así denominan desde o ANPA Pardo Bazán do CEIP Froebel as protestas que se iniciaron este 24 de xaneiro e que terán continuidade todas as semanas motivadas pola falta de información sobre a reforma prevista na última fase de melloras do centro educativo.
Escolares portando flotadores, gorros de baño e lentes acuáticas protagonizaban esta primeira concentración reivindicativa, acompañados por familiares, nun acto semi improvisado que se manterá todos os mércores ante a entrada do centro.
"Nenos entre charcos. Reforma xa" e "10 anos agardando. Xunta cumpre xa" eran as frases que lucían nas pancartas realizadas para esta pequena acción na que se denuncian as numerosas pingueiras que continúa a sufrir o centro cando se producen choivas abundantes.
Eva Lourenco, presidenta do ANPA, sinala que a Xunta de Galicia prometeu máis dun millón de euros para acometer esa última fase da reforma, que inclúe o necesario cambio de cuberta. Malia estas promesas, a obra aínda non figura na documentación oficial sobre os proxectos previstos en centros educativos de Pontevedra para este ano.
"Imos protestar ata que nos presenten un documento asinado pola Xefatura Territorial de Educación con data para o comezo das obras", indica Eva Lourenco, quen lembra que estes traballos anunciáronse en 2013 e agora mesmo, a pesar de que se prometeron para o verán de 2024, non constan en ningún documento por parte da Consellería de Educación.
Ante esta situación, alertan de que continuarán mantendo protestas xa que a situación do centro escolar resulta perigosa para os escolares e tamén para o profesorado cada vez que se encharcan determinadas zonas comúns do patio interior do centro e os corredores de acceso ás aulas.
Relacionadas:
-
Novo 'Mércores Negro' no CEIP Froebel para esixir á Xunta confirmación por escrito da execución da reforma en 2024
Por Mónica Patxot & Anxo Lourido |
-
A reforma do colexio Froebel, segundo Educación, comezará este mesmo ano
Por Redacción |
-
A Xunta anuncia novas obras no CEIP Froebel, EEI Concepción Crespo Rivas, IES A Xunqueira II e Frei Martín Sarmiento
Por Redacción |
-
Volve entrar auga no interior do colexio Froebel, tras un verán de obras no tellado
Por Anxo Lourido |
-
Compromiso para acometer este verán traballos de limpeza e tratamento nas cubertas e canlóns do Froebel
Por Anxo Lourido & Mónica Patxot |
-
A Consellería de Educación busca cos técnicos municipais unha solución de urxencia para o CEIP Froebel
Por Anxo Lourido |
-
É unha piscina? Non, é unha nova inundación no patio interior do colexio Froebel tras as fortes chuvias
Por Anxo Lourido |