O Goberno local de Poio: "estamos tranquilos porque non hai ningún desvío raro que se nos poida imputar"
Por Natalia Puga
Todo o equipo de goberno do Concello de Poio, o bipartito BNG-PSdeG, lanzou este martes unha mensaxe de unión ante a decisión do fiscal xefe de Pontevedra, Juan Carlos Aladro, de enviar ao xulgado a denuncia do PP polas supostas "anomalías" económicas e de contratación, que se produce no Goberno local de forma "reiterada". O alcalde, Luciano Sobral, compareceu publicamente acompañado do resto de edís nacionalistas e socialistas e asegurou que todos eles "estamos tranquilos".
"Por suposto que estamos tranquilos dentro da importancia que ten o feito porque nós consideramos que non hai ningún desvío digamos raro ou algunha cousa que se nos poida imputar", indicou o rexedor nacionalista tras coñecer a través de prensa a intención do fiscal de xudicializar o caso.
Sobral recoñeceu que o Pleno da Corporación levantou reparos de Intervención e aprobou recoñecementos extraxudiciais de crédito como os que denuncia o PP, pero sostivo que, ao seu enteder, este proceder non é constitutivo de ningún delito, senón que "en todo caso é unha cuestión administrativa que en lugar de tratar as cousas dunha maneira se recorreu a un recoñecemento extraxudicial".
O alcalde asegurou que non tivo ningunha comunicación oficial desa xudicialización do caso ("a día de hoxe ningún me comunicou nada") e que dende a Fiscalía de Pontevedra non se lle requiriu ao Concello ningunha documentación complementaria á denuncia do PP á marxe da declaración da interventora municipal para que se ratificase nos seus informes. Si ten constancia de que o fiscal pediu informes ao Concello de Contas, pero "non sabemos que información" en concreto.
Luciano Sobral sinalou que "non sabemos cal vai ser o recorrido deste proceso" que empezou en novembro cunha denuncia do PP e que agora se xudicializa, pero insistiu na tranquilidade de todo o Goberno local (a denuncia vai dirixida contra todo o equipo) e asegurou que "daremos conta do que corresponda chegado o momento".
Ademais, mostrou a súa total disposición a colaborar coa Xustiza e sinalou que o seu equipo de goberno ten a "conciencia moi tranquila" porque se actuou con total transparencia e "todo o que está feito está aí, está sobre a mesa". Proba diso é que o PP tivo acceso á documentación que remitiu á Fiscalía á hora de presentar a denuncia.
A maior parte da súa comparecencia pública sostívoa en datos sobre a situación económica do Concello de Poio que logo referendaron o concelleiro de Facenda, Xulio Barreiro, e o tenente de alcalde, Chelo Besada. Insistiron en que a débeda viva da Administración local pasou de 10 millóns en 2010 a 7,6 en 2013, o que supuxo que hai tres anos supoñía o 105% do total e agora o nivel de endebedamento quedou no 70,74%, unha redución "considerable".
"Non entendemos a actitude do PP de levar algo que debería estar no ámbito da administración e da política á Xustiza"
Indicaron que "o Concello, a día de hoxe, non ten débedas con ningún subministrador", polo menos non pagamentos pendentes superiores a 30 días e achegaron máis datos económicos nos que sosteñen que basean a súa política e que puideron xustificar que, en determinados momentos, o Goberno local tivese que recorrer aos recoñecementos extraxudiciais de crédito que agora se pon en cuestión. O "100% dos gastos" que fixeron con cargo a esas modificacións presupostarias "están xustificados" e sosteñen que esa fórmula está permitida pola propia lei.
Sobre a base deses datos e argumentos, "entendemos que o que se está xulgando non é unha desviación de fondos de forma ilícita, nin malversacións, nin desvíos de caudales públicos, senón algunha norma que recolle a lei".
Os tres concelleiros aseguran non entender a actitude do Partido Popular de xudicializar a vida política, que "cremos na Xustiza", pero non comparten a "actitude do PP de levar algo que debería estar non ámbito da administración e da política á Xustiza". Barreiro interpreta que con esta denuncia o partido da oposición "o que pretende é buscar no ámbito xudicial o que non consegue no ámbito político".
Relacionadas:
-
O PP denuncia que o Concello de Poio deixou sen contabilizar 600.000 euros en facturas de 2014
Por Redacción |
-
O PP de Poio responde ao Goberno local: "estamos fartos de vaciles, o único que queremos é que cambien a forma de gobernar"
Por Redacción |
-
Fiscalía traslada ao Xulgado a denuncia do PP de Poio contra o Goberno local por anomalías económicas
Por Natalia Puga |
-
O PP de Poio denuncia ante Fiscalía "anomalías en temas económicos e de contratación" no Concello
Por Diego Espiño |