Un cambio normativo e a factura electrónica atrasan os pagamentos a provedores do Concello
Por Alejandro Espiño
Dende principios deste ano, os provedores do Concello de Pontevedra tardan máis en cobrar as súas facturas. Non se trata, en todo caso, dun atraso excesivo -unha media de quince días máis que no último trimestre de 2014-, pero suficiente para que dende o goberno municipal aseguren que intentarán poñer os medios necesarios para rebaixar esa cifra e manter os seus bos parámetros anteriores.
En concreto, no primeiro trimestre de 2015 pagáronse 6.152.134 euros en facturas. O período medio de pagamento situouse en 38,35 días, fronte aos 23,08 do trimestre anterior. Ademais, o Pazo saldou as súas débedas cos seus provedores en 18,66 días de media e o Instituto Municipal de Deportes tardou 32,73 días.
Este aumento da demora, segundo Raimundo González, débese a dous factores.
Por un lado un cambio normativo que amplía a 60 días o prazo de pagamento unha vez que a factura entra por rexistro nos concellos, fronte aos 30 días que había de marxe dende que a devandita factura era aprobada polo servizo correspondente. E por outro, pola posta en marcha da factura electrónica que, nos seus primeiros meses, provocou en todo o Concello un "proceso de adaptación".
XUNTA DE GOBERNO
Ademais, o voceiro do goberno municipal avanzou que este luns se prorrogou por un ano a xestión do CITA coa empresa Etnoga por valor de 26.716 euros. Tamén se aprobou o proxecto e contratación de traballos de mantemento en vías rurais, nos que se investirán 241.995 euros; e dunha serie de actuacións relacionadas coa mobilidade e a seguridade vial na N-541 no ámbito da igrexa de Mourente, valorados en 240.332 euros.
Relacionadas:
-
O Concello reduce os prazos de pago aos provedores de 50 a 35 dias en tan só un ano
Por Redacción |
-
A factura electrónica deixa de retrasar o pago aos provedores do Concello
Por Redacción |
-
Recoñecen que a implantación da factura electrónica "vai orixinar certos problemas" en Pontevedra
Por Alejandro Espiño |