Un policía local denuncia un hostaleiro por botar uns vendedores do rastro da Verdura e montar a súa terraza
Por Anxo Lourido
Unha nova situación conflitiva rexistrouse este domingo na praza da Verdura entre algúns vendedores ambulantes do rastro e os hostaleiros da zona cando tentan montar as súas mesas para instalar o servizo de terraza neste espazo público.
Nesta ocasión, Álvaro Ibaibarriaga do establecemento Pintxo Viño denuncia que, como todos os domingos ao redor das 12.00 horas, a praza está ocupada polos ambulantes, moitos deles de orixe romanesa, que teñen o material, principalmente roupa, esparexido polo chan. A esa hora, o hostaleiro quixo montar as mesas da terraza no espazo que ten adxudicado polo Concello.
Ibaibarriaga afirma que, en numerosas ocasións, algúns ambulantes conflitivos protestan e mesmo lles ameazan cando se lles indica que teñen que abandonar esa zona. Por este motivo, o empresario solicitou a un axente da policía local que lle pedise aos vendedores que abandonasen o lugar. Con todo, sempre segundo a versión do hostaleiro, o policía negouse a facelo.
Ante esta situación, o xerente do Pintxo Viño decidiu "convidar" el mesmo aos vendedores do rastro a que abandonasen a superficie na que tiña que montar as súas mesas. Non se produciron incidentes, pero Ibaibarriaga recoñece que lle reprochou ao axente que non levase a cabo o servizo que lle solicitara. Ante esta reacción, o policía prohibiulle que instalase as mesas e as cadeiras da terraza do Pintxo Viño. Ante esta orde, o empresario indicou que el pagaba a súa taxa para instalarse nesa zona desde hai oito anos e continuou montando. O axente levantou acta e denunciou o empresario por desacato ante a autoridade.
Ibaibarriaga mostrouse sorprendido pola reacción e afirma que non entende como poden sancionalo cando tenta exercer o seu dereito para instalarse na praza polo que paga unhas taxas, mentres os ambulantes non pagan ningún canon. Na tarde do domingo achegouse ata as oficinas da Xefatura da Policía Local para solicitar unha copia da denuncia. Alí dixéronlle que ata o martes non podía recollela nin presentar unha queixa.
O empresario púxose en contacto coa concelleira de Seguridade Cidadá, Carme da Silva, para transmitirlle o seu malestar pola denuncia.
Este incidente enmárcase dentro das protestas xurdidas ante a proliferación de novos vendedores no rastro de antigüidades da Verdura e que levou ao goberno local a estudar a posibilidade de trasladalo á rúa Serra.
Relacionadas:
-
Álvaro Ibaibarriaga, hostaleiro multado na Verdura: "Me han metido 601 euros por levantarme para ir a trabajar"
Por Natalia Puga & Mónica Patxot |
-
Da Verdura á rúa Serra: así foi o primeiro día do novo mercado de antigüidades
Por Alejandro Espiño |
-
O PP pide retomar a ordenanza de venda ambulante para regular o mercado de antigüidades
Por Redacción |
-
O mercadillo da Verdura será trasladado á rúa Serra "nun prazo curto de tempo"
Por Redacción |
-
O Concello, disposto a regular o "caos" do mercadiño de antigüidades da Verdura
Por Alejandro Espiño |
-
Os comerciantes e veciños da Praza da Verdura demandan a regulación do mercado de antigüidades dominical
Por Redacción |