Empezan a baleirar e apontoar o Pazo Mariño de Lobeira
Por Redacción
O Pazo Mariño de Lobeira, situado entre a rúa César Boente e a Praza da Pedreira, comezou a baleirarse. Empezou a traballar a empresa contratada polos propietarios para cumprir coa orde municipal de que retirasen de xeito inminente os entullos que estaban a sobrecargar a estrutura do inmoble, desmontasen os elementos non estruturais nin singulares da edificación e realizasen os apuntalamentos necesarios para asegurar o inmoble, recoñecido como singular.
A orde do servizo de Disciplina Urbanística emitiuse a semana pasada, só 24 horas despos de que os propietarios alertasen do "grave risco de colapso" da edificación, adxuntado un informe técnico. Solicitaban permiso para o desentullo de elementos xa derrubados e apuntalamento de certos elementos estructurais deste edificio para o que Patrimonio xa autorizou a súa declaración de ruína "condicionada".
A orde municipal subliña que a desmontaxe dos elementos estruturais e singulares que se atopen en mal estado deberá de someterse á autorización da Comisión Territorial do Patrimonio Histórico de Pontevedra, previa documentación dos mesmos xa que se trata dun edificio catalogado e suxeto a protección do Peprica.
O informe técnico municipal recolle que parte da estrutura de madeira colapsou arrastrando parte da cuberta ao interior da edificación. Ademáis outra parte da estrutura de madeira presenta esgotamento da súa capacidade portante "ofrecendo perigo de colapso".
Coa finalidade de evitar o colapso xeneralizado os técnicos informaron favorablemente a retirada dos entullos que están a sobrecargar a estrutura existente, a desmontaxe dos elementos non estruturais nin singulares da edificación así como ao apuntalamento para asegurar o inmoble, debendo dar traslado de dita autorización á Consellería de Cultura pois deberá someterse á autorización da Comisión Territorial do Patrimonio Histórico de Pontevedra previa labor de documentación dos mesmos.
Ademáis, a propiedade deberá adoptar as medidas necesarias que garantan o mantemento das características e dos elementos singulares do edificio, "non pudendo incluír máis derrubas das necesarias", coa obriga de reposición do ben ao seu estado primitivo.