Nove servizos do CHOP seleccionados entre os cinco mellores de España
Por Redacción
Nove servizos e procesos asistenciais do Complexo Hospitalario Universitario de Pontevedra foron elixidos finalistas aos premios "Best in Class 2016", que convoca anualmente a publicación especializada Gaceta Médica, xunto coa Cátedra de Innovación e Xestión Sanitaria da Universidade Rei Juan Carlos.
Os premios Best in Class (BIC) teñen como obxectivo recoñecer publicamente os mellores servizos, unidades e procesos asistenciais de hospitais e centros de saúde de todo o ámbito nacional, tanto públicos como privados, destacando a excelencia na atención ao paciente e o bo facer dos profesionais sanitarios.
Nas súas respectivas categorías, en total foron nove os servizos e procesos asistenciais do Complexo Hospitalario Universitario de Pontevedra os que resultaron elixidos finalistas: a sección de Reumatoloxía, o servizo de Farmacia, Anestesia, Dermatoloxía, Dixestivo, como servizo e pola súa atención á Hepatite C; Psiquiatría, como mellor servizo no tratamento da esquizofrenia, a unidade de Nutrición, a sección de procesos infecciosos do servizo de Medicina Interna e Atención ao Paciente.
A concesión destes premios está baseada fundamentalmente na puntuación obtida polos candidatos co Índice de Calidade Asistencial ao Paciente (ICAP), que se establece a partir da análise multivariable dos datos recollidos nos cuestionarios de autoavaliación cubertos polos hospitais e centros de atención primaria.
Gañadores e finalistas formarán parte da Guía dos Mellores Hospitais e Servizos Sanitarios que a organización dos premios BIC edita anualmente. O acto oficial da entrega dos galardóns terá lugar o vindeiro 10 de novembro en Madrid.
Relacionadas:
-
O servizo de dermatoloxía do CHOP segue a acumular premios
Por Redacción |
-
O CHOP logra 12 candidaturas finalistas nos premios "Best in class 2017"
Por Redacción |
-
O servizo de dermatoloxía do Chop, nomeado como o mellor de España na atención á psoriase
Por Redacción |
-
Premian o novo servizo de urxencias de Montecelo
Por Redacción |
-
Un proxecto conxunto do CHOP e Belas Artes é finalista dos premios Manancial 2016
Por Redacción |
-
Premian o servizo de farmacia dos hospitais de Pontevedra e O Salnés
Por Redacción |