O mal estado da tubaxe da auga adía as obras no acceso ao CEIP Vilaverde
Por Redacción
O Concello de Pontevedra tomou a decisión de adiar a execución das obras de mellora da accesibilidade e seguridade viaria na contorna do CEIP Vilaverde-Mourente ata o remate do curso escolar.
É unha decisión baseada na necesidade de enfrontar uns traballos máis complexos do agardado no subsolo e garantir a seguridade da comunidade escolar. A medida conta coa aprobación da dirección e a ANPA do colexio.
Alberto Oubiña, concelleiro delegado da parroquia de Mourente, deu conta este martes nunha rolda de prensa da paralización das obras, após da inspección do interior da canalización da auga que descorre preto do centro educativo e que amosou o mal estado de conservación da infraestrutura. Os servizos técnicos municipais tiñan detectado certa anomalía no trazado polo que instaron á inspección que resultou determinante.
Como comprobaron os técnicos cunha cámara, a tubaxe de canalización da auga, que é de microcemento, presenta aplastamentos en distintos tramos, hai fendas, filtracións de auga, acumulación de area e nalgún punto por localizar unha vertedura irregular de augas fecais, segundo Alberto Oubiña.
Fronte a esta realidade hai que abrir unha gabia de 2,5 metros de profundidade, levantar a tubaxe e repoñela. A execución desta obra impediría o acceso do autobús escolar ao CEIP Vilaverde e suporía un risco para os rapaces, familias e profesores que cada día entran e saen do centro.
A paralización da obra é temporal. "Quero comunicarlle aos pais e nais e á veciñanza que a obra se vai a facer, está contratada e seguirá adiante", subliña o concelleiro delegado de Mourente.
O Concello adxudicara no seu día a obra de mellora da accesibilidade e seguranza viaria na contorna do CEIP Vilaverde á empresa Elsamex, que mantén as condicións do contrato asinado.
O proxecto ten un orzamento de 158.670 euros e un prazo de execución de catro meses. Consiste basicamente na construción dunha plataforma única, colocación de sinalización horizontal e vertical, aproveitamento de sobreanchos da rúa que será asfaltada e a instalación de pasos sobreelevados (lombos), ademais a actuación completarase coa creación dun espazo específico para uso do transporte escolar.
A mellora da contorna do CEIP Vilaverde é unha actuación incluída nun convenio de colaboración Concello-Deputación asinado en decembro de 2017. O incremento do custe da obra estará a cargo do contrato de mantemento do rural.
Relacionadas:
-
VÍDEO.- A renovada contorna do colexio Vilaverde, desde o aire
Por Redacción |
-
A mellora da seguridade viaria no ámbito do colexio Vilaverde chegará ata a Avenida de Lugo
Por Alejandro Espiño & Mónica Patxot |
-
Máis seguridade viaria para o ámbito do colexio Vilaverde
Por Alejandro Espiño |
-
A seguranza viaria no colexio Vilaverde e outras colaboracións do Concello e a Deputación
Por Redacción |