Comeza a colocación do novo céspede artificial do campo de Chan da Barcia
Por Redacción
O Concello de Ponte Caldelas iniciou este martes a renovación do céspede artificial do campo de fútbol de Chan da Barcia. A empresa adxudicataria, Mecano Sport, agarda ter rematados os traballos para o inicio da tempada, "ese será o obxectivo, que o 8 de setembro a SCD Ponte Caldelas teña o campo listo, co novo céspede colocado", afirmou nesta xornada o alcalde Andrés Díaz.
O Goberno local cumpre así cos compromisos adquiridos coa Sociedade Cultural e Deportiva Ponte Caldelas e iniciou nesta xornada a substitución dun tapete de herba sintética que data de hai 13 anos e que foi recibido xa a comezos do anterior mandato coa vida útil esgotada, ao tratarse dunha primeira xeración deste tipo de material que, ademais, deteriorouse aceleradamente pola falta dun mantemento adecuado.
Para a colocación do novo céspede o concello asumirá un investimento de 156,171 euros, procedente das arcas municipais. Así Andrés Díaz quere amosar "que os seus compromisos se cumpren" e a súa "aposta polo deporte" en Ponte Caldelas.
A empresa adxudicataria, Mecano Sport, dispón dun prazo máximo de execución de 28 días, polo que as molestias para o club de fútbol serán mínimas e os novos terreos de xogo estarán pronto en disposición de seren utilizados.
A nova superficie de xogo do campo de fútbol terá unha vida útil de 20 anos ao estar confeccionada cos últimos adiantos tecnolóxicos e céspede homologado. Ademais, para garantir a súa durabilidade será sometida a un plan de tratamento, con limpezas periódicas e un mantemento integral anual.
As obras consisten na colocación dos 6.720 metros cadrados da nova alfombra, previa aplicación dunhas 40 toneladas de area de sílice e, finalmente, o reparto doutras 30 toneladas de caucho. A herba terá unha altura de entre 40 e 65 milímetros.
Relacionadas:
-
Chan da Barcia estreará o seu novo céspede artificial en tres semanas
Por Redacción |
-
Adxudicado o novo céspede artificial do campo de fútbol e a pista de pádel de Chan da Barcia
Por Redacción |
-
Dúas empresas compiten polas obras de renovación do céspede do campo de fútbol de Chan da Barcia
Por Redacción |
-
Licitan as obras do novo céspede artificial do campo de fútbol de Chan da Barcia
Por Redacción |