Trece anos despois dos seus primeiros pasos, a Rolda Leste de Pontevedra xa é unha realidade. Os primeiros coches comezaron a circular este xoves por este novo vial que, a partir de agora, conectará a coñecida como rotonda de Juviol na PO-542 co novo acceso a Montecelo e Príncipe Felipe na PO-532.

A rolda, que ten un trazado de 970 metros, quedou aberta ao tráfico tras completarse unhas obras, impulsadas pola Deputación de Pontevedra e o Concello de Pontevedra, que supuxeron un investimento de 3,3 millóns de euros.

Os técnicos estiman que por este vial, que ten dous carrís de circulación e unha senda peonil e ciclista, circulen ata 5.000 vehículos ao día.

O alcalde de Pontevedra, Miguel Anxo Fernández Lores, destacou que coa posta en marcha desta nova infraestrutura viaria "resolvemos problemas" ao mellorar os accesos a un equipamento "fundamental" como o hospital de Montecelo e facilitar a mobilidade nesta zona "con criterios razoables" de acougado de tráfico.

"É un exemplo de como hai que facer as cousas, mellorando a mobilidade e sen xerar problemas no territorio", dixo Fernández Lores.

A este respecto, César Mosquera engadiu que se trata dunha solución "moi digna, pouco invasiva e adaptada ao territorio" e que permitirá resolver o "problema grave" que se rexistraba na Rúa das Pereiras e a Rúa das Olivas, viais moi estreitos que utilizaban moitos condutores para chegar ata o hospital.

A presidenta da Deputación, Carmela Silva, lembrou que esta rolda era "moi demandada" tanto polo goberno municipal como polos veciños e destacou que este vial forma parte dun modelo de mobilidade "do século XXI" polo que aposta o executivo provincial en todas as súas actuacións.

Ademais, Silva celebrou que o modelo pontevedrés "non quede na zona máis urbana" e se acheguen solucións de mobilidade e accesibilidade tamén en zonas "máis periféricas", nas que tamén se recuperen espazos públicos para os cidadáns e, ao mesmo tempo, "responda ás necesidades" de todos os usuarios.

Con respecto ás demandas de melloras na execución deste vial, entre eles os veciños que reclaman pasos de peóns ou arrombar a conexión con Pintor Laxeiro, as autoridades sinalaron que "todo se andará" e avanzaron que haberá novas actuacións para resolver as deficiencias que se poidan detectar.