Xa se atopan instalados os redutores de velocidade na Rolda Leste, os coñecidos popularmente como lombos, que teñen como finalidade limitar os excesos de velocidade que se detectaban nesta vía que conecta a subida a Príncipe Felipe e Montecelo coa estrada do Marco a Bora. O límite de velocidade é de 30 km/h.

Segundo informa o Concello de Pontevedra, foron creados tres lombos e un paso de peóns sobreelevado, atendendo ás peticións veciñais para aumentar a seguridade viaria. Os traballos inclúense dentro do contrato de mantenemento das vías rurais, que xestiona o concelleiro responsable do Rural, Alberto Oubiña.

A Policía Local realizou medicións nesta zona e obtiña datos de intensidade circulatoria media diaria e velocidade tomando como referencia tres días significativos da semana: un venres ao rexistrarse as máximas intensidades circulatorias; o sábado ao tratarse dun día de transición entre máximos e mínimos; e un domingo como referencia de intensidades mínimas, por ser un día de descanso para a maioría da cidadanía.

Nas tres xornadas tomadas como referencia, a velocidade superou o 30 km/ h. de media. O venres e o sábado, a velocidade situábase nunha media de 50 km/ h, mentres que o domingo alcanzaba o 55 km/ h.

Esta Rolda Leste foi inaugurada en outubro de 2019, ten un trazado de 970 metros e a obra impulsouse desde a Deputación de Pontevedra e o Concello de Pontevedra, cun investimento de 3,3 millóns de euros.