Cuntis esixe á veciñanza que limpen con urxencia as fincas en mal estado
Por Redacción
Máis dun cento de notificacións enviou xa o Concello de Cuntis aos propietarios das parcelas que, tanto no ámbito rural como no urbano, están descoidadas e cheas de vexetación seca e ao lado de vivendas e estradas, o que constitúe un autentico perigo para a seguridade cidadá.
A todos eles, o goberno municipal ínstalles a limpar as parcelas e acometer as franxas de protección "de maneira urxente" debido ao elevado risco de incendio que supón a proliferación de terreos descoidados nesta época do ano.
Dous técnicos municipais están dedicados a estas xestións, explica o alcalde, Manuel Campos, que advirte que estes expedientes levan consigo un ultimato no que se advirte que se non se actúa na limpeza da franxa de protección se procederá á interposición de sancións.
O alcalde lembrou que Cuntis, segundo a Consellería de Medio Rural, está entre as zonas con risco alto ou extremo de incendio, "polo que temos que tomar as máximas precaucións e tomar conciencia para previr na medida do posible a lacra dos lumes".
Pola súa banda, o propio Concello está desenvolvendo ao longo das últimas semanas un importante labor no ámbito da prevención de incendios mediante a execución de traballos de limpeza tanto cos tractores como coas brigadas antiincendios.
Trátase de accións de prevención mediante rozas e eliminación de maleza en camiños municipais, en parcelas de propiedade do Concello, así como naqueles espazos de uso público máis concorridos como áreas recreativas ou espazos turísticos como o Castro de Castrolandín.
Relacionadas:
-
Cuntis repetirá brigada anti incendios este verán e empeza a buscar persoal
Por Redacción |
-
Tres incendios intencionados calcinan dúas hectáreas de monte en Cuntis
Por Redacción |
-
Pleno comprometido coa igualdade e a sustentabilidade no Concello de Cuntis
Por Redacción |
-
Un incendio forestal intencionado queda ás portas dun núcleo de vivendas en Cuntis
Por Alejandro Espiño |
-
Cuntis repetirá experiencia de ter unha brigada de loita contra os incendios e busca 8 traballadores
Por Redacción |
-
Segundo incendio forestal en Cuntis en menos dun mes
Por Oskar Viéitez |