Tres centros educativos de Pontevedra xa forman parte do Club de Letras
Por Redacción
Os institutos Valle Inclán e A Xunqueira II e o colexio Vilaverde son tres dos 56 centros educativos de Galicia que forman parte do Club de Letras, unha iniciativa que busca mellorar as competencias lingüísticas do alumnado, tanto orais como escritas, a través de distintas actividades que fomenten o debate, a reflexión e a lectura crítica.
Este club, impulsado pola Consellería de Cultura, Educación e Universidade, está formado por alumnado e profesorado e é coordinado por unha das persoas docentes participantes.
As actividades que os centros deseñen no marco do Club de Letras desenvólvense fóra do horario lectivo e o tempo dedicado a esta actividade deberá chegar a unha media de catro horas ao mes desde que se inicia o proxecto ata que finaliza o período lectivo do curso.
Este curso a temática xira en torno ao coidado, desde unha perspectiva de responsabilidade e corresponsabilidade nas tarefas e nos labores necesarios para a atención das persoas que están a padecer unha situación de vulnerabilidade causada pola enfermidade, pola pobreza, pola soidade, pola dor, pola violencia de xénero, pola LGTBIfobia ou outras circunstancias.
Esta vulnerabilidade mesmo puido producirse ou agravarse durante o período de confinamento vivido a raíz da pandemia da covid-19 e podería abordarse a temática do coidado neste contexto.
Os proxectos realizados sobre este tema poderán abordarse desde un punto de vista literario, artístico, filosófico ou histórico e poderán centrar o seu foco de interese na actualidade, en anteriores etapas da historia ou conxugando ambos os dous enfoques.
O Club de Letras defínese como un espazo de aprendizaxe non formal baseado nunha metodoloxía de indagación.
Neste marco o profesorado suxire diferentes accións enfocadas ao alumnado co obxecto de que poidan afondar, descubrir e coñecer novos eidos relacionados coas Humanidades, as Artes e as Ciencias Sociais.
Fundaméntanse, polo tanto, nunha metodoloxía baseada no descubrimento, a indagación, o debate, a lectura reflexiva, a análise crítica, a creación e a aprendizaxe colaborativa.
No caso da educación primaria, a iniciativa achegarase a estes eidos do coñecemento fundamentalmente a través da escritura creativa, a exploración e creación artística, a lectura reflexiva e fomentando, de ser posible, unha achega lúdica e dinámica.
Na educación secundaria e bacharelato procurarase unha visión transversal e interrelacionada das manifestacións literarias e artísticas, abordando perspectivas filosóficas ou históricas, así como a potenciación da capacidade creativa e de lectura reflexiva, coa finalidade de fomentar competencias de comprensión e de pensamento crítico do mundo actual.