Educación prepara un proxecto para a rehabilitación integral do instituto Valle-Inclán e prevé investir 2,5 millóns
Por Natalia Puga & Mónica Patxot
A Consellería de Educación está a redactar un proxecto para a rehabilitación integral do instituto Valle Inclán de Pontevedra que supoñerá actuar desde o teito ás estruturas e os equipamentos e carpintería. O proxecto custará aproximadamente 2,5 millóns de euros dos que 600.000 euros xa están consignados nos orzamentos da Xunta de Galicia para 2021.
De momento, descoñécese a data exacta de inicio dos traballos, pero o conselleiro de Educación, Román Rodríguez, anunciou que prevén licitar as obras "de xeito inmediato" en canto o proxecto estea terminado para comezar "o máis rápido posible". A súa intención é empezar leste mesmo ano.
Román Rodríguez anunciou esta actuación este luns durante unha visita ás instalacións situadas na a avenida Montero Ríos e sinalou que o proxecto será "moi significativo" para este instituto, un centro educativo "de referencia non só de Pontevedra, senón do conxunto de Galicia", o primeiro que funcionou en Pontevedra e que ten unha presenza física e arquitectónica dentro da cidade "incuestionable".
O edificio, "un dus máis significativos" da cidade, que utilizan a diario unhas 850 persoas e que ten gran valor "cultural e patrimonial". Do Valle Inclán Román Rodríguez destacou que é un activo educativo "fundamental" da provincia de Pontevedra e que ten un peso cultural "moi importante" e nel, por exemplo, rodáronse películas de notable éxito.
O alcalde de Pontevedra, Miguel Anxo Fernández Lores, destacou a importancia do edificio que alberga este instituto, "un edificio histórico de Pontevedra" e a transcendencia do centro a nivel educativo en toda Galicia, como institución pola que pasaron Xosé Filgueira Valverde ou o Doutor Enrique Marescot, e no que el mesmo estivo durante catro anos.
"Este é un edificio que queremos conservar", reclamou, e agradeceu a sensibilidade da Consellería de Educación ao destinar esta parte importante importante do seu orzamento para realizar unha rehabilitación que "significa poder dar clase moitísimos anos máis neste instituto que forma parte da historia de Pontevedra".
A directora do Valle Inclán, Pilar Freitas, que leva xa 3 décadas no centro e considérao "como a miña segunda casa", aplaudiu o proxecto, en especial no relativo ao tellado, pois dá "bastantes problemas" de pingueiras e humidades. "Esperemos que quede precioso", manifestou, xunto ao seu desexo de estar no centro para ver o resultado.
Á visita ao centro tamén asistiron, ademais do conselleiro, o alcalde e o equipo directivo do centro, o portavoz municipal do PP, Rafa Domínguez, e o xefe territorial da Consellería de Educación en Pontevedra, César Pérez Ares.
Relacionadas:
-
A reforma do IES Valle-Inclán comezará en 2023 cun orzamento de 4,7 millóns
Por Cristina Saiz & Anxo Lourido |
-
Román Rodríguez: "A situación sanitaria dos centros educativos evoluciona conforme a situación xeral"
Por Natalia Puga & Mónica Patxot |
-
Tres centros educativos de Pontevedra xa forman parte do Club de Letras
Por Redacción |
-
Os docentes do Valle-Inclán alertan: "Non se garantiza a saúde do alumnado nin do profesorado"
Por Manu Otero |
-
Educación autoriza o uso de mamparas nas aulas do instituto Valle Inclán
Por Oskar Viéitez |