Rexeita o acordo que lle ofrece a Fiscalía para evitar o cárcere por romperlle os dentes a outro nuha pelexa
Por Oskar Viéitez
"Antes de empezar el juicio se me ofreció un acuerdo por parte de la fiscal para no ingresar en prisión, pero yo no puedo soportar que se me culpe de algo que no hice", así de firme mostrouse ante o tribunal Brais O.F. un veciño de Pontevedra para o que o Ministerio Público pide unha pena de seis anos de cárcere por unha agresión á saída dun pub da zona monumental.
Segundo a versión dos feitos do acusado aquel día encontrábase no pub "Fifty" sito na rúa Barón de Pontevedra cando outro cliente Gonzalo Adolfo O.E. iniciou unha discusión intentando agredilo cun vaso.
Para evitar ser golpeado co vaso, Brais agarrou polo brazo a Gonzalo. Durante ese forcexo acudiron varias persoas para separar os contendentes, entre outros o dono do local e un camareiro, que a empuxóns lograron botar a Gonzalo do pub, quedando Brais no seu interior. Segundo esta versión do acusado, en ningún momento lle propinou puñazo ningún como si sostivo o supostamente agredido, quen recoñeceu ademais que aquela madrugada do día 3 de decembro do ano 2010, se encontraba moi bebido e que tras ser expulsado do pub caeu na rúa.
O dono do pub e o camareiro testificaron que Gonzalo estaba aquela noite moi agresivo e que provocou a pelexa intentando agredir co vaso, asegurando que en ningún momento viron o puñazo que alega a acusación.
Durante o xuízo celebrado este martes 17 na sección cuarta da Audiencia provincial de Pontevedra, a dentista que atendeu ao supostamente agredido explicou que a reposición das pezas dentarias supuxo un total de 9.760 euros e que ao seu paciente xa lle faltaban outros dous dentes antes daquel suceso. Ademais sinalou que a perda dos dentes era perfectamente compatible co traumatismo producido por unha caída.
Gonzalo presentou denuncia por aqueles feitos dous meses e medio despois da liorta.
Para o fiscal estes feitos son constitutivos dun delito de lesións polo que pide unha pena de seis anos de prisión. E pide ademais que o acusado indemnice o agredido na cantidade de 700 euros polas lesións e 9.760 euros pola reparación da dentadura.
Pola contra o avogado da defensa pide a libre absolución ao entender que existe a eximente completa de lexítima defensa, a falta de testemuños que acrediten que houbo agresión por parte do seu defendido e que os peritos explican que o golpe puido producirse por unha caída o que crea unha dúbida razoable.
O avogado da defensa apuntou que mesmo existe base abondo como para denunciar o supostamente agredido por falso testemuño.