Esixen á Xunta o arranxo "inmediato" da estrada vella a Marín por estar "obsoleta"
Por Alejandro Espiño
Nova ofensiva desde Pontevedra para que a Xunta de Galicia acometa unha reforma integral da PO-546, a estrada vella de Pontevedra a Marín por Lourizán. O goberno municipal esixe o arranxo "inmediato" deste vial, que consideran que está "obsoleto".
O edil Alberto Oubiña recoñeceu que esta petición "non é nova" e que se trata dunha demanda "insistente" da asociación de veciños Estriceres, que reclamou esta actuación en numerosas ocasións ante o "perigoso" estado desta estrada.
Tras máis de corenta anos sen ningún tipo de arranxo, o vial ten zonas "intransitables", beirarrúas que se desprenden ou pasos de peóns borrados, entre outras deficiencias. Ademais, nel rexístranse "altas velocidades" do tráfico ao non haber elementos que acouguen o tráfico.
"Non é unha petición menor. Non é unha cuestión estética ou de pequenos arranxos. É moito máis", defendeu Oubiña, que considera que na PO-546 existe un problema de seguridade "real", especialmente para as persoas que transitan a pé por ela.
Percorrer a distancia que separa Pontevedra e Marín por esta estrada é "imposible" en condicións de seguridade, sinalan desde o goberno municipal de Pontevedra, que explican que hai zonas nas que este vial é "absolutamente inaccesible".
O concelleiro do BNG entende que "non podemos quedar de brazos cruzados" ante a deterioración que sofre esta estrada que, ademais, soporta un notable tráfico pesado cos camións que chegan a ENCE, o que empeora a seguridade viaria en todo o seu trazado.
Este problema agrávase ademais para as persoas con mobilidade reducida, que se atopan con beirarrúas estreitas, pasos de peóns con chanzos ou farois e sinalas no medio das beirarrúas. Nalgúns tramos, segundo Alberto Oubiña, "teñen que baixar ao carril de circulación".
O Concello de Pontevedra asegura estar "disposto" a colaborar na reforma desta estrada. "Se é necesario chegar a algún acordo económico non estaremos en contra", avanzou Oubiña, que espera que este ofrecemento axude a que a Xunta "lle dea unha pensada" a unha actuación que, por agora, rexeitou.
Relacionadas:
-
Pontevedra, disposta a asumir a PO-546 se a Xunta antes a reforma por completo
Por Alejandro Espiño |
-
Medio quilómetro da estrada vella a Marín, en Estribela, será rehabilitado de xeito integral
Por Alejandro Espiño |
-
Os socialistas levan ao Parlamento a situación "lamentable" da estrada vella de Marín
Por Redacción |
-
O BNG denuncia no Parlamento que a estrada vella a Marín "leva 40 anos sen que se lle puxese a man enriba" e pide a reforma integral
Por Redacción |
-
Estriceres pide á Xunta a mellora da estrada vella de Marín por segunda vez en catro meses
Por Redacción |