Marín aposta por 'Edukasano' para incentivar a vida saudable entre a mocidade
Por Redacción
O Concello de Marín e a Universidade de Vigo asinaron un convenio de colaboración para poñer en marcha no municipio o proxecto 'Edukasano', co que se busca mellorar os hábitos de vida da poboación relacionados coa práctica da actividade física e dunha dieta equilibrada.
A alcaldesa, María Ramallo, e o vicerreitor do campus de Pontevedra, Jorge Soto, asinaron este convenio polo que pretenden incrementar o coñecemento entre a mocidade sobre a orixe de determinadas enfermidades como a diabetes ou a obesidade a través de iniciativas educativas innovadoras.
Os responsables do proxecto realizarán unha avaliación entre a mocidade sobre alimentación saudable e actividade física para deseñar un programa baseado no contexto social e medio ambiental.
Ademais, avaliarán que pode entorpecer á adopción de estilos de vida saudables e establecerán as bases que permitan un cambio de modelo, transmitindo valores e hábitos relacionados coa alimentación variada, sa, equilibrada e coa práctica regular de actividade física.
Desde a Universidade de Vigo destacan que para xerar cambios nos modelos de comportamento e nos hábitos "é fundamental actuar desde a Escola" porque é "indubidable" o papel que teñen os profesionais, o profesorado e os educadores.