Impulsan unha senda peonil entre Noalla e A Lanzada co Pazo de Quintáns como eixo
Por Redacción
Tras a rehabilitación do Pazo de Quintáns, na que se investiron preto de 2 millóns de euros, toda esta zona actuará como eixo cunha senda peonil que unirá Noalla e A Lanzada.
Así o anunciaron de xeito conxunto a Deputación de Pontevedra, o Concello de Sanxenxo e a Delegación do Goberno en Galicia, as tres administracións que colaboran na recuperación deste espazo patrimonial, todo un emblema do municipio.
A senda, que terá 1,2 quilómetros, irá desde a igrexa de Santo Estevo ata o acceso á praia da Lanzada. Ao mesmo tempo tamén se mellorará a seguridade pola estrada EP-9212.
O proxecto ten un orzamento de 910.606 euros, que se financiarán a través dun convenio entre a Deputación e o Concello. A previsión é licitar xa en breve a actuación, que terá un prazo de execución de seis meses.
A senda peonil terá un mínimo de 2,5 metros de ancho e descorrerá pola marxe dereita da estrada e paralela ao seu actual trazado en plataforma única, salvo en tres zonas onde vai ser necesario facer plataformas de convivencia, con prioridade para peóns e nas que haberá medidas de calmado de tráfico e redución da velocidade.
Tamén se prevé a execución do reforzo do firme na plataforma e a renovación da sinalización horizontal e vertical.
Na zona do Pazo de Quintáns haberá unha serie de actuacións, que permitirán integrar elementos orixinais da edificación coa senda e plataforma de convivencia proxectadas, como a restauración do lousado orixinal de granito, a recuperación da cuneta perimetral do muro de peche e a resolución do encontro entre os pavimentos de pedra e formigón mediante a interposición dun bordo de pedra da mesma variedade litolóxica que as lousas existentes.
O alcalde, Telmo Martín, destacou que tras a rehabilitación do pazo, a nova fase deste proxecto "vaille dar moito máis valor a esta contorna" ao converter esta estrada nunha zona acondicionada para o desfrute da veciñanza.
Amais de comezar a programar visitas a Quintáns entre a veciñanza e as asociacións de Noalla, o Concello quere tamén avanzar na musealización da contorna da ermida da Lanzada, dentro da súa aposta por captar turismo ao longo de todo o ano.
A presidenta da Deputación, Carmela Silva, sinalou que o Pazo de Quintáns "é unha verdadeira xoia do patrimonio que merecía que fixéramos unha actuación potente" e subliñou que esta contorna "precisaba este espazo público no que os peóns sexan o centro de todo".
Silva celebrou que Sanxenxo e outros concellos da provincia se teñan acollido "con paixón" a este modelo provincial de mobilidade e engadiu que tanto a mellora do Pazo de Quintáns como a nova senda van ser puntos de referencia para "atraer xente a Sanxenxo durante todo o ano a través dun turismo pluriexperiencial e emocional".
Pola súa banda, o delegado do Goberno en Galicia, José Miñones, quixo destacar a colaboración das tres administracións neste proxecto porque "sumar sempre é o camiño" para poder seguir construíndo un territorio mellor. "Auguro moito futuro a este pazo", concluíu.
Relacionadas:
-
A Deputación e o Concello de Sanxenxo construirán outra senda peonil desde a igrexa de Noalla ata o vello cuartel
Por Oskar Viéitez |
-
Comeza a creación dun itinerario peonil pola estrada de Noalla á praia da Lanzada
Por Oskar Viéitez |
-
Noalla estreará a senda peonil cara a praia da Lanzada antes do próximo verán
Por Redacción |
-
A xustiza avala a catalogación da Lanzada como praia natural e protexida
Por Redacción |
-
Reforzan a pasarela de madeira da senda peonil e ciclista da Lanzada
Por Redacción |
-
Os veciños de Noalla visitan o Pazo de Quintáns tras a primeira fase de rehabilitación
Por Redacción |
-
Avanza a recuperación do exterior do Pazo de Quintáns cun investimento por riba dos 600.000 euros
Por Redacción |
-
A Xunta colaborará co Concello de Sanxenxo na posta en marcha do Pazo de Quintáns
Por Redacción |
-
Sanxenxo converte o Pazo de Quintáns no primeiro museo da cultura gastronómica das Rías Baixas
Por Redacción |