Cerdedo-Cotobade xa ten os terreos para construír a residencia de maiores de Carballedo
Por Redacción
O Concello de Cerdedo-Cotobade dá por finalizado o expediente para a expropiación forzosa de 10.688 metros cadrados de chan rústico para a construción da residencia da terceira idade de Carballedo, así como o estudo de viabilidade económica deste proxecto que contempla un investimento de 3 millóns de euros, dos que o Concello achegará, con fondos propios, 750.000 euros.
Esta instalación supoñerá a creación dunha vintena de postos de traballo e a atención de 59 persoas na residencia, ademais de entre 16 e 26 prazas no centro de día.
O expediente de ocupación recolle a afección de cinco parcelas de chan rústivo bicadas nas inmediacións da Casa do Concello, o centro de saúde e o aparcamento público de Carballedo. Os terreos, que superan lixeiramente a hectárea de superficie, pertencen xa a un proxecto de interese público xeral como é a construción dunha residencia xeriátrica.
O alcalde, Jorge Cubela, móstrase moi satisfeito polos avances que está a dar o proxecto e por dar resposta a "unha demanda social moi importante" como é a construción dunha segunda residencia para maiores pública no Concello, que xa conta cunha recentemente ampliada en Cerdedo.
A partir do momento no que se adxudique o contrato, o prazo de execución das obras será de 14 meses. Na súa primeira fase, a residencia contará con capacidade para 59 residentes, aínda que será susceptible de duplicarse. Tamén se prevé a creación dun centro de día do que se poderán beneficiar entre 16 e 26 usuarios.
"Estamos a avanzar polo bo camiño para sacar adiante un proxecto moi ambicioso e que nos permitirá ampliar dunha maneira ampla nosa capacidade de atención aos nosos maiores que precisan dunhas instalacións e duns coidados que se lle van a garantir coa nova Residencia da Terceira Idade de Carballedo. Ademais, esta iniciativa permitirá afianzar poboación e fomentar o emprego estable e de calidade dunha maneira directa e tamén indirecto no noso municipio. A nosa intención é superar calquera escollo que se poida producir para que entre en funcionamento antes de finalizar o presente mandato. É un reto importante, pero estamos seguros de poder alcanzalo ou polo menos faremos todo o posible para que non sufra ningún atraso”, indicou Cubela.
Relacionadas:
-
Unha única empresa opta ao contrato de construción da residencia de maiores e centro de día de Carballedo
Por Redacción |
-
A ampliación da residencia de maiores de Cerdedo-Cotobade eleva a 64 as prazas públicas no municipio
Por Redacción |
-
Os regulamentos para a residencia de maiores e o centro de día de Carballedo saen adiante coa maioría do PP
Por Redacción |
-
Cerdedo-Cotobade pide informes financeiros para a residencia de maiores de Carballedo
Por Redacción |
-
Cubela lembra aos socialistas que o proxecto de residencia de Carballedo inclúe un centro de día
Por Redacción |
-
Feijóo garante o compromiso da Xunta cos proxectos prioritarios para Cerdedo-Cotobade
Por Redacción |
-
Comeza a expropiación de parcelas para a construción da Residencia de Carballedo
Por Redacción |
-
A residencia de maiores de Carballedo, pendente dun ditame de Urbanismo da Xunta
Por Redacción |