Investigadores da Universidade de Vigo estudarán a presenza de microplásticos en macroinvertebrados nos ríos da provincia
Por Redacción
A Deputación de Pontevedra e a Universidade de Vigo volven a sumar sinerxías a través dun novo convenio que permitirá ampliar o estudo sobre as implicacións medioambientais e o efecto que teñen os microplásticos nos ríos da provincia.
Así o anunciaron este xoves a presidenta provincial, Carmela Silva, e o reitor da universidade, Manuel Reigosa, no acto de sinatura deste acordo que conta cun orzamento de 20.000 euros.
Este convenio chega para dar continuidade ao asinado en 2020 "sobre microplásticos na auga e na comunidade de invertebrados nos ríos Lagares de Vigo e Gafos de Pontevedra" e ten por obxecto coñecer de preto "a influencia que poidan ter os microplásticos nun sector como é o da pesca, fundamental para a nosa economía, e moi particularmente na saúde das persoas".
A presenza de microplásticos en masas de auga é un dos principais problemas ambientais. O ser humano ten producido 8.300 millóns de toneladas métricas de plástico desde 1950, unha cifra que ten graves consecuencias como o feito de que no mar existan 51.000 millóns de partículas microplásticas. Este problema tamén afecta o reino animal onde, por exemplo, o 90% das aves mariñas teñen fragmentos de plásticos nos seus estómagos.
Carmela Silva anunciou que "tan pronto estea rematado o estudo daremos a coñecer a información que se teña elaborado e tamén planificaremos medidas para poder dar resposta á situación que se nos formule".
O reitor da Universidadee de Vigo tamén fixo fincapé no eixo principal do convenio asinado e asegurou que "hai que investigar e coñecer como están os nosos ecosistemas, e que mellor obxecto de empezar que os ríos, que nos poden dar unha medida da súa saúde".
"Creo que é un enfoque moi positivo desde o punto de vista científico", engadiu.