Falece Ángel Caruncho, excontador do Liceo Casino e secretario da Peña da Boina
Por Ramiro Espiño
Despois dunha longa loita contra a enfermidade, na tarde deste sábado falecía en Pontevedra Ángel Jesús Caruncho Amor, á idade de 84 anos.
Natural de Ferrol, pero afincado desde hai moitísimos anos en Pontevedra, da que se consideraba fillo adoptivo, Caruncho tivo unha extensa e recoñecida traxectoria profesional como director de banca, exercendo o cargo de máxima responsabilidade na oficina principal da antiga Caixa Postal de Aforros (logo Argentaria).
Pero, paralelamente a esa actividade profesional, Ángel Caruncho foi un activo participante na vida cidadá da capital do Lérez, tanto que non se concibe o Liceo Casino sen a figura fundamental na súa directiva de Caruncho, que exerceu o cargo de Contador durante nada menos que 21 anos, desde 1985, con José Ángel Fernández Arruty como presidente, ata a súa substitución no ano 2006, no que alcanzou a presidencia da veterana sociedade pontevedresa Eduardo Barros.
Igualmente, Caruncho era membro da Peña da Boina, na que ostentou o cargo de secretario, e do Rotary Club Pontevedra, entidade benéfica coa que colaborou durante moitos anos, formando parte tamén da súa xunta directiva.
Os restos mortais de Ángel Caruncho serán incinerados na tarde deste domingo, día 20, na intimidade familiar, tras a celebración da liturxia que terá lugar ás 17:00 horas, na capela do Tanatorio Albia (subida a Montecelo).