Preocupación no BNG polo peche de consultas médicas en horario de tarde no Centro de Saúde de Marín
Por Redacción
Este venres 1 de xullo suspéndense as consultas médicas en horario de tarde no Centro de Saúde de Marín durante os meses de verán. Unha situación que é denunciada polo BNG de Marín que lamente este "novo recorte no funcionamento" do centro sanitario.
Lucía Santos, portavoz da agrupación nacionalista, indica que nos últimos días o Punto de Atención Continuada (PAC) foi atendido por persoal médico de Bueu, provocando que este municipio veciño quedase sen servizo de urxencias e obrigando aos residentes en Bueu a trasladarse a Marín en caso de emerxencia médica.
Para Santos esta situación mostra os problemas na atención sanitaria derivada da "política de recortes" e da "privatización" que aplica a Xunta de Galicia nos últimos 13 anos. Alerta de que o persoa sanitario resulta insuficiente para atender as demandas da poboación causando listaxes de espera de semanas; con liñas telefónicas saturadas; persoas con doenzas crónicas que carecen de boa atención; demoras nas revisións de pediatría; e esperas de meses para atención de fisioterapia ou para consulta do dentista.
Lembra que a poboación marinensa, de aproximadamente 24.000 persoas, increméntase durante os meses de verán e por este motivo pide á alcaldesa María Ramallo que demande á Consellería de Sanidade unha dotación de persoal sanitario necesario para garantir unha atención sanitaria de calidade nos centros de saúde de Marín e de Seixo.
Relacionadas:
-
Denuncian a carencia de pediatras durante o Nadal en Marín, cunha soa profesional para urxencias
Por Redacción |
-
O BNG volve pedir solucións para o centro de saúde de Marín, no que as Urxencias se viron "desbordadas"
Por Redacción |
-
Presentan por rexistro no Parlamento Galego un paquete de medidas para "salvar a atención Primaria"
Por Redacción |
-
Trece centros de saúde da área reforzaranse con 21 das 106 prazas de médico de Atención Primaria que convoca a Xunta
Por Redacción |