Unha empresa luguesa especializada en arte restaurará a capela da Nosa Señora da Lanzada
Por Redacción
Parteluz Estudio, unha empresa de Lugo especializada en restauración e conservación artística, será a responsable das obras para restaurar a capela da Nosa Señora da Lanzada, en Sanxenxo.
Así o recolle o portal de contratación da Xunta de Galicia, no que figura que o investimento para acometer esta actuación ascenderá a 110.000 euros.
O obxectivo é garantir a conservación deste ben incluído no catálogo do patrimonio cultural de Galicia e evitar un posible deterioro irreversible ou a perda de elementos de valor artístico e cultural difíciles de recuperar.
Para conseguilo, o proxecto que se porá en marcha nas vindeiras semanas, cun prazo de execución aproximado de cinco meses, inclúe traballos de limpeza e consolidación na superficie pétrea.
Consistirán na eliminación de plantas superiores, na preconsolidación de placas de pedra e limpeza mecánica da superficie, na eliminación dos morteiros deteriorados e de cemento, na desalación e no selado de gretas e fendas, entre outras tarefas.
Ademais asentaranse as sopenas e a cruz da fachada principal, á que tamén se lle devolverá a verticalidade.
A maiores, executarase un estudo histórico-arqueolóxico mediante sondaxes arqueolóxicas manuais e farase un levantamento 3D da capela mediante fotogrametría, escalado e xeoreferenciado exterior.
A ermida da Nosa Señora da Lanzada é un templo dos séculos XII ou XIII, situado na parroquia de Noalla. O lugar de emprazamento, anteriormente unha illa e a día de hoxe un istmo, estivo habitado desde tempos remotos. Alí apareceron restos dun antigo castro do século VIII a.C.
Relacionadas:
-
Estudan crear un espazo de lecer en terreos situados entre a estrada da costa e o vial do Telleiro
Por Redacción |
-
A restauración da ermida da Lanzada rematará en setembro
Por Redacción |
-
Un investimento de 120.000 euros para garantir a conservación da ermida da Lanzada
Por Oskar Viéitez |
-
Compromiso da Xunta para mellorar a ermida de Nosa Señora da Lanzada con 50.000 euros
Por Redacción |