A Fundación Galega contra o Narcotráfico entregará este venres os seus Premios Nécora de Ouro que son outorgados anualmente para recoñecer o meritorio labor desenvolvido por persoas e entidades na loita contra o narcotráfico e as drogodependencias. 

Nesta ocasión Antonio Martínez Duarte, comisario xefe da Brigada Central de Estupefacientes da Policía Nacional recibirá a Nécora de Ouro "en recoñecemento ao seu sobresaliente labor na loita contra o tráfico de drogas e o branqueo de capitais". 

Desde a fundación destacan que ao longo dunha "dilatada e exitosa" traxectoria profesional, en pleno exercicio actualmente, Antonio Martínez Duarte dirixiu e desempeñou un "papel crave" en operacións contra destacadas organizacións criminais, así como o armazón económico e loxístico que as sustenta.

É o caso, entre outros moitos, da Operación Roble (2007), Operación Tabaiba (2009) ou a Operación Mito (2018), ás que se suma a recente desarticulación do maior laboratorio de produción de cocaína de Europa, instalado en Cerdedo-Cotobade.

O seu traballo á fronte de GRECO Galicia en Pontevedra (2006-2017) e actualmente como máximo responsable da Brigada Central de Estupefacientes, converteuno en "un principais referentes da loita antidroga a nivel nacional e internacional". Segue a manter, ademais, unha gran vinculación con Pontevedra.

Tamén recibirá a Nécora de Ouro a Sociedade Europea para a Investigación en Prevención "pola importancia do traballo de impulso e investigación na prevención de adiccións baseada na evidencia científica e a súa aplicación para mellorar a saúde e o benestar das persoas".

Esta sociedade, composta por cualificados profesionais, converteuse en asesor cualificado de organismos europeos como o Observatorio Europeo sobre Drogas e Toxicomanías. 

Ademáis recibirá unha Nécora de Ouro o xornalista, recentemente xubilado, José Antonio Pérez Docampo "en recoñecemento á súa dilatada e meritoria carreira profesional no ámbito da información sobre narcotráfico e drogodependencias, desenvolta desde 1985 ata a actualidade". 

Os galardóns serán entregados na gala anual programada para este venres 28 de abril a partir das 20:30 horas no Auditorio de Vilagarcía de Arousa, que contará coa actuación do Coro Liceo de Vilagarcía.