En xullo se lanzará o Bono Xove Xacobeo, con descontos para a mocidade que faga o Camiño
Por Oskar Viéitez
O presidente da Xunta, Alfonso Rueda, avanzou este sábado en Campo Lameiro que a Xunta poñerá en marcha o vindeiro mes de xullo o Bono Xove Xacobeo, un vale dirixido á mocidade con 500 euros de descontos en establecementos turísticos do Camiño de Santiago.
Rueda fixo este anuncio durante o acto de nomeamento da localidade de Campo Lameiro como Capital do Turismo Rural 2023 tras unha votación en toda España, promovida polo portal web Escapada Rural.
O novo bono turístico vai dirixido aos mozos que teñan o carné xove -é dicir menores de 30 anos- e estará dotado de 500 euros, dos que 200 serán aportados pola Xunta.
Entre os requisitos para recibir este vale está que os beneficiarios deberán aloxarse un mínimo de catro noites en establecementos turísticos do Camiño de Santiago e facer un gasto adicional ao aportado pola Xunta de polo menos 300 euros.
Rueda resaltou que "o Xacobeo do pasado ano foi un punto de partida excepcional que non podemos perder". Ademais, os datos avalan o bo momento que está a vivir a comunidade no eido turístico, xa que houbo case máis dun 50 % de visitantes estranxeiros ca o ano pasado e moi bos resultados en canto ao número de viaxeiros aloxados e de pernoctacións no primeiro trimestre deste ano.
RECOÑECEMENTO CAMPO LAMEIRO
Por outra banda, Rueda resaltou que Campo Lameiro é un modelo a seguir no eido do turismo sustentable.
O presidente animou a toda a localidade e comarca a aproveitar a oportunidade que supón o nomeamento de Capital do Turismo Rural 2023 para avanzar como destino turístico, pero sen perder a esencia que caracteriza e singulariza a esta localidade.