Luís López asume a presidencia da Deputación coa intención de "aplicar solucións diferentes e políticas distintas"
Por Oskar Viéitez & Cristina Saiz
Luís López 'Lugués' tomou posesión este xoves como novo presidente da Deputación de Pontevedra e avanzou a súa intención de "abrir unha nova etapa e aplicar solucións diferentes e políticas distintas", que basicamente, segundo concretou "este cambio vai orientar nunha acción de goberno pensada para os concellos e polos concellos".
O novo presidente provincial sinalou que "unha das cuestións que queremos cambiar é a proximidade con todas as administracións locais da provincia", polo que anunciou a súa intención de visitar todos os concellos, no primeiros seis meses de mandato.
Luís López tamén avanzou cal será a "filosofía de actuación" do novo goberno provincial apuntando que "non vimos cun ánimo revisionista, pero tampouco imos aceptar, con total lealdade, políticas e decisións contrarias aos nosos principios".
É este executivo hai sete alcaldes e outros tantos concelleiros, algúns con responsabilidades nos seus gobernos locais e outros que exercen desde a oposición.
Tamén tivo o novo presidente palabras de agradecemento ao goberno saínte formado polo Partido Socialista e o BNG, e "de cara ao futuro", pediu aos dous grupos da oposición "que sigan traballando arreo pola provincia" xa que Luís López comprométese a "ter a man absolutamente tendida e un ánimo máximo de colaboración".
SESIÓN DE INVESTIDURA
A Banda de Gaitas da Provincia de Pontevedra, dirixida por Hipólito Cabezas, recibiu na escalinata interior do Pazo Provincial á nova corporación e aos 300 invitados que asistiron este xoves á sesión de investidura da Deputación de Pontevedra.
César Mosquera, presidiu a mesa de idade xunto a Ana Laura Iglesias, ao ser os deputados de maior e de menor idade, respectivamente. "Como sabedes aquí estase para ler o que di o secretario", chanceou o deputado nacionalista.
A continuación xuraron ou prometeron os seus cargos todos os deputados, sendo o primeiro o propio Mosquera.
Un por un foron pasando ante un atril no que estaba un exemplar da Constitución Española os 27 deputados (14 do PP, 9 do PSOE e 4 do BNG) que utilizaron, maioritariamente, a fórmula habitual para xurar o cargo, incluíndo no caso dos deputados do Bloque a promesa de "defender os intereses xerais do pobo galego e os dereitos nacionais de Galiza" coa excepción de María Ortega que engadiu o seu compromiso coa "defensa da Memoria histórica", responsabilidade de exerceu durante o pasado mandato.
O acto contou coa presenza do presidente da Xunta de Galicia, Alfonso Rueda, do alcalde de Pontevedra, Miguel Anxo Fernández Lores; a ex ministra Ana Pastor, os ex presidentes da Deputación, Rafael Louzán e César Mera; o conselleiro de Cultura, Román Rodríguez, o de Sanidade, Julio García Comesaña; o presidente da Audiencia Provincial, Francisco Javier Menéndez; o fiscal xefe da Audiencia, Pablo Varela; o reitor da Universidade de Vigo, Manuel Reigosa e outras autoridades civís e militares e representantes de colectivos sociais, económicos, deportivos e do mundo da xudicatura e a educación.
Nin o Partido Socialista nin o BNG presentaron candidato á Presidencia aínda que o PSOE non renunciou a dar un discurso no que, durante 13 minutos, o portavoz Carlos López Font, fixo un balance da xestión do anterior goberno bipartito.
O portavoz do Bloque, César Mosquera, desde a presidencia do pleno limitouse a darlle un consello a Luís López: "Non se que tal vas de costas pero se estás mal esta cadeira vai cambiándoa".
No seu primeiro discurso, o de presentación da súa candidatura á Presidencia da Deputación de Pontevedra, Luis López Diéguez lembrou que o Partido Popular foi "o único partido con representantes provinciais procedentes dos sete partidos xudiciais de Pontevedra e gañamos, con maioría absoluta de representantes, en seis deles".
"Somos a Deputación que queres, a que vela polos intereses de todos os concellos", sentenciou Lugués.
RUEDA
Ao terminar o acto oficial o presidente da Xunta de Galicia, Alfonso Rueda mantivo un encontro cos xornalistas no que manifestou que "hoxe é un día de alegría", en primeiro lugar polo propio Luís López "creo que o merece e ademais reúne moitísimas condicións" dixo en referencia á súa experiencia de xestión e política xa que, entre outros cargos, foi alcalde de Rodeiro e delegado territorial da Xunta en Pontevedra.
E tamén por esa "cooperación", que segundo Alfonso Rueda identifica a Luís López que "non leva nada á confrontación ou a rivalidades" polo que se mostrou convencido de que "ábrese unha etapa de moitísima colaboración entre a Xunta de Galicia e a Deputación de Pontevedra e, desde logo, en todo o que dependa da miña iso vai ser unha realidade".
Como presidente do Partido Popular de Galicia, Alfonso Rueda engadiu que "agora empeza unha etapa dura, ilusionante e creo que pode ter, coa xente que empeza esta andaina, moi bos resultados".
Relacionadas:
-
E a Deputación regresou ás mans do PP, con Luis López como presidente
Por Alejandro Espiño |
-
Lores solicita por carta entrevistarse cos presidentes da Xunta e a Deputación de Pontevedra
Por Diego Espiño |
-
A Deputación e a Fundación Alexandre Bóveda colaborarán para pór en valor a figura do ilustre galeguista
Por Oskar Viéitez |
-
A Deputación de Luís López constitúe a súa xunta de goberno e avaliará as contas públicas
Por Manu Otero & Cristina Saiz |
-
Luís López configura o seu "núcleo duro" nomeando dous vicepresidentes
Por Oskar Viéitez |