Galicia estrea un novo modelo asistencial para a enfermidade inflamatoria intestinal
Por Redacción
A sanidade galega estreará un novo modelo asistencial para as enfermidades inflamatorias intestinais que fomentará o seguimento domiciliario e a formación de enfermería especializada para atender a estes pacientes.
O conselleiro de Sanidade, Julio García Comesaña, presentou este venres en Pontevedra este proceso asistencial integrado, elaborado en colaboración coas asociacións de enfermos de crohn e colite ulcerosa, entre outras patoloxías.
No deseño deste protocolo participaron especialistas en medicina dixestiva, ademais de pediatría, radioloxía, reumatoloxía, enfermería, farmacia e medicina familiar.
O novo modelo homologa en todo o sistema público de saúde os criterios de sospeita diagnosticada, especificando os síntomas que deben levar a solicitar probas complementarias e as outras patoloxías que se deben descartar antes de derivar ao hospital.
Ademais, esta guía ten como reto garantir a continuidade asistencial, definindo a relación entre atención primaria e hospitalaria e a relación coa atención de enfermería, establecendo a necesidade de existencia de persoal especializado en enfermidade inflamatoria intestinal.
Definir tanto os síntomas como as necesidades de orientación sobre tratamento, nutrición ou sexualidade nas que o paciente debe acudir ao persoal de enfermería é outra das súas utilidades.
Ante a posibilidade de que os pacientes acudan a urxencias por complicacións ou brotes, o sistema coordina a atención ambulatoria e o seguimento domiciliario a través da plataforma de teleasistencia, que monitoriza a súa evolución a través de biomedidas e cuestionarios periódicos.
Para garantir a continuidade asistencial, establécese ademais un protocolo para facilitar a transición entre a atención pediátrica e a de adultos.
"Esta é unha patoloxía que acompaña ao paciente ao longo da súa vida e o sistema sanitario debe acompañalo tamén sen problemas", sinalou García Comesaña, que lembrou que a aparición destas enfermidades é máis frecuente entre os 15 e os 35 anos.
Relacionadas:
-
Sanidade reivindica en Sanxenxo o papel da enfermería na plataforma TELEA e no control do risco cardiovascular
Por Redacción |
-
O Colexio de Farmacéuticos de Pontevedra premia o labor de ASSEII
Por Redacción |
-
A Asociación Socio Sanitaria Educativa Inflamatoria Intestinal presenta unha guía sobre esta enfermidade
Por Oskar Viéitez |
-
Pontevedra amplía a súa rede de aseos para persoas con ostomía con novos baños inclusivos no CIM e no Provincial
Por Manu Otero |