Moreira esixe a Lores saber se Pontevedra seguirá tratando os seus residuos en Sogama
Por Redacción
Os concellos galegos poden desistir do convenio asinado con Sogama para o tratamento dos seus residuos antes do 1 de marzo. Foi unha das medidas adoptadas pola Xunta de Galicia no marco das queixas que suscitou a subida dun 33,5% do canon que abonan as administracións locais. Por iso Jacobo Moreira quere que o goberno municipal aclare a súa postura respecto deste prazo e informe publicamente se Pontevedra vai seguir ou non con Sogama.
Nun comunicado, os populares aseguran que o alcalde, Miguel Anxo Fernández Lores, "leva máis de tres lustros renegando do sistema de tratamento de residuos de Sogama e defendendo, certamente hoxe con moita menos vehemencia que hai unha década, a viabilidade dun suposto modelo alternativo" e esixen coñecer os seus plans "pois quince anos foi tempo suficiente para idear e desenvolver ese segundo proxecto".
No caso de continuar levando os residuos a Cerceda, di Jacobo Moreira que "sería de xustiza que Lores abandonara por fin as súas mensaxes hipócritas contra o modelo impulsado pola Xunta".
A "teima" do alcalde con Sogama viuse tamén reflectida, recorda o portavoz popular na cidade, no longo enfrontamento mantido en relación ao canon que correspondía pagar por contrato. E con respecto á sentenza perdida recentemente polo goberno municipal, Moreira insiste en que a Administración Local "non pode repercutir nos veciños as negativas consecuencias daquela resolución xudicial".
Moreira asegura que os veciños "xa estiveron pagando esa cantidade durante o tempo que durou o litixio, cunha das taxas de recollida de lixo máis caras de Galicia, uns cartos que o Concello cobraba aos cidadáns pero que ao mesmo tempo escatimaba a Sogama", polo que insta a que o goberno municipal "minimice enormemente a próxima suba do canon decidida por Sogama despois de tantos anos de cobrar de máis aos contribuíntes".
Relacionadas:
-
Os populares deciden levar ao pleno a "estafa política" do Concello co recibo da recollida de lixo
Por Oskar Viéitez |
-
Pontevedra leva ao Tribunal Constitucional o seu preito polas facturas de Sogama
Por Alejandro Espiño |
-
Cada fogar pontevedrés pagará 1 euro máis ao mes pola subida do canon de Sogama
Por Alejandro Espiño |
-
O Concello de Pontevedra estuda fórmulas para reducir o impacto da suba da taxa de Sogama
Por Redacción |
-
Pontevedra estuda sumarse á fronte de concellos que se uniron contra o 'tasazo' de Sogama
Por Alejandro Espiño |