Absolven o ex alcalde de Campo Lameiro, acusado de delito urbanístico polas obras da depuradora
Por Redacción
A Audiencia de Pontevedra absolveu o ex alcalde de Campo Lameiro, Julio Sayáns, para o que a Fiscalía pedía sete anos de cárcere por delitos de falsidade documental e contra a disciplina urbanística por irregularidades nas obras de instalación dunha depuradora.
O fiscal entendía que a depuradora construída para dar servizo ao polígono industrial da Facha de Campo, executadas entre os anos 2013 e 2015, ocupou unha zona de terreos que figuraban como zona verde e tamén uns terreos que pertencían a unha construtora.
Ademais de Sayáns, rexedor deste municipio durante 36 anos, entre 1983 e 2019, primeiro como independente e desde 1991 nas filas do PP, o tribunal absolveu os outros dous acusados, a secretaria municipal e o enxeñeiro que realizou o proxecto e dirixiu a obra.
As maxistradas da sección cuarta da Audiencia de Pontevedra sosteñen que "non quedou acreditado" que os acusados actuasen "con intencionalidade ou coñecemento" ao cambiar a orientación da depuradora e invadir terreos que non eran públicos.
A obra foi modificada durante a execución porque dous dos módulos previstos da nova depuradora tiñan problemas de conexión coa rede de saneamento.
O feito de que a nova depuradora se executara no mesmo lugar no que se construíu a antiga, no ano 2007, "reforza a verosimilitude", segundo o tribunal, de que ninguén pensou que a nova obra puidese expor problemas de orde urbanística "debido a que ningún se derivou da anterior nos anos que levaba construída".
A sentenza non é firme e se pode recorrer ante o Tribunal Superior de Xustiza de Galicia.
Relacionadas:
-
Un ano xudicial marcado polo triplo crime de Valga, os clans do Vao e os delitos sexuais
Por Natalia Puga |
-
Acepta unha condena de dous anos de cárcere por violar unha menor
Por Oskar Viéitez |
-
Informes técnicos alongan o xuízo contra o ex alcalde de Campo Lameiro pola construción da depuradora
Por Natalia Puga & Cristina Saiz |
-
Sayáns, exalcalde de Campo Lameiro acusado de delito urbanístico na instalación da depuradora: "para nós estaba ben situada"
Por Anxo Lourido |
-
A Audiencia Provincial tentará de novo celebrar o xuízo contra o exalcalde de Campo Lameiro Julio Sayáns
Por Oskar Viéitez |