Desarticulan un punto negro de venda de droga e incautan catro sacos con 50 quilos de marihuana en Vilagarcía
Por Redacción
A Policía Nacional dá por desarticulado un punto negro de venda e distribución de droga en pleno centro de Vilagarcía de Arousa no que se interviñeron catro sacos cun total de 50 quilos de plantas de marihuana.
Segundo a información facilitada pola Policía Nacional, o dispositivo desenvolveuse con axentes uniformados que atoparon catro sacos cargados con plantas de marihuana cun valor aproximado de 30.000 euros.
A incautación é resultado dun dispositivo preventivo dos realizados pola Policía Nacional para atallar en Vilagarcía o menudeo e pequeno tráfico de substancias estupefacientes e tratar de erradicar os puntos negros de venda de drogas.
Desde a Comisaría Provincial destacan o labor das unidades de investigación de Policía Xudicial e seguridade cidadá, que colaboran coa delegación de participación cidadá, á que chegan as queixas veciñais pola existencia dos puntos negros.