Brillante medalla de prata para Gómez Noya en Bermuda na súa volta ás Series Mundiais
Por Diego Espiño
Golpe encima da mesa de Javier Gómez Noya no seu regreso ás Series Mundiais, a máxima competición do tríatlon na modalidade olímpica. Se alguén dubidaba que tras un ano afastado da especialidade e centrado na longa distancia non ía ser tan competitivo como antes, equivocábase de pleno.
O campeinísimo galego, con cinco títulos mundiais ITU ás súas costas, revolucionou só coa súa presenza a segunda cita do calendario en Bermuda, convertendo a carreira en trepidante.
Gómez Noya e o vigués Antonio Serrat foron os únicos españois que completaron os 1.500 metros de natación no grupo cabeceiro de 15 unidades que lideraba o francés Vincent Luís e no que tamén estaban Henri Schoeman ou Jonathan Brownlee, entre outros. O maior damnificado, o mallorquino Mario Mola, actual campión mundial e que quedaba cortado.
O ritmo no sector ciclista, con 40 quilómetros por diante, non decaeu grazas ao entendemento e á pelexa por diante, o que agrandaba aínda máis a desvantaxe de Mola ata deixarlle descartado para o triunfo a pesar do seu sempre boa carreira a pé.
Schomburg, que marchou en solitario nos últimos quilómetros de ciclismo, chegou á última transición con 35 segundos. Por detrás Vincent Luís, Van Egdon, Schoeman ou o francés Coninx. Gómez Noya baixábase da bicileta no posto 18 un pouco máis atrasado, pero pronto recortaba distancia.
Tras cazar ao alemán Schomburg, o grupo dianteiro quedaba en cinco unidades, e entre elas estaba un Gómez Noya que ía a por todas. Tratou de atacar ata en dúas ocasións descolgando a Vincent Luís, pero Dorian Coninx contraatacou a falta de 300 metros para impoñerse finalmente no sprint sobre a liña de meta e deixando ao galego cunha brillante e valiosa medalla de prata cun tempo de 1 horas, 50 minutos e 38 segundos, despois de superar a Gustav Iden, que completou o podio.
Un resultado que lle enche de moral ante unha tempada chea de retos que continuará para el dentro dunha semana na casa, en Pontevedra, co Campionato do Mundo de Longa Distancia o vindeiro sábado 4 de maio.
Relacionadas:
-
Gómez Noya apúntase á carreira sprint das Series Mundiais en Montreal e soña co seu sexto título
Por Diego Espiño |
-
Yokohama, segunda parada do ano para Gómez Noya nas Series Mundiais
Por Redacción |
-
Volta ás Series Mundiais para Gómez Noya antes de competir en Pontevedra
Por Redacción |
-
Saleta Castro, Gómez Noya e Pablo Dapena, confirmados no equipo nacional do ITU Multisport Festival
Por Redacción |
-
Noya regresa quinto ao calendario ITU na Copa do Mundo de New Plymouth
Por Sofía Lorenzo |
-
Gómez Noya sobre o ITU Multisport de Pontevedra: "Se este Mundial fose en calquera outro lugar posiblemente non o correría"
Por Diego Espiño |